Politica

Parlamentario Endy Croes: Mike de Meza no tin berguensa? “Mike a malgasta 20 miyon di RDA sin cu Refineria a habri, mas 782 mil na e ‘reapertura’ cu Destra”


ORANJESTAD,Aruba

Parlamentario Endy Croes por a scucha ex minister corupto di AVP Mike de Meza yora den conferencia di prensa riba CITGO. Segun Mike de Meza cu gobierno tin culpa di tur locual ta pasando den CITGO. Alabes Mike de Meza a yora y sclama cu Minister President no ta bin Parlamento pa duna informacion riba CITGO. Segun Mike e mihor cos por pasa ta pa e gobierno bay cas pa e mes bin bek y fix tur cos. Parlamentario Endy Croes ta puntra su mes ta riba cual planeta Mike de Meza ta biba? Mike de Meza no ta ni yega trabou. Si Mike de Meza haci esfuerso pa bin traha e tin derecho legitimo pa haci preguntanan por escrito, e por yama un vragen uur, e por solicita pa un bijeenkomst cu e minister. Pues tin yen di tools como Parlamentario pa yega na informacion. Pero drumi henter dia den mansion na Colony y lanta un bes pa siman y bay conferencia di prensa na cas di partido no ta sistema di traha. Pio ainda bo mester tin berguensa di cobra bo salario fin di luna. 

MdM a mara Aruba na man cu pia

Parlamentario Endy Croes lo haci un peticion na su colega Edgar Vrolijk, presidente di comision di energia, pa yama un reunion pronto pa nos debati riba e mal maneho di ex minister Mike de Meza alrespecto RDA/CITGO y mira alabes con e kehonan oficial ta canando. Mike de Meza a firma tur contract di CITGO cu e mafiosonan kendenan mayoria ta cera awe. Hustamente Mike de Meza a mara Aruba na man cu pia cu un contract di 2000 pagina. 

Malgastamento di placa di RDA

Mike de Meza mester responsabilisa su mes cu e placa cu RDA a malgasta desde october 2016 pa november 2017. Un total di 20 miyon comproba a wordo malgasta. Un fiesta sin fin serafin. Mike de Meza por splica pueblo cual compania(nan) di sonido a cobra 702 mil pa fiestanan na RDA? Mike de Meza por splica cual agencia di biahe a ricibi 624 mil? Ta biahamento pa loco y fiesta tabata tin. Mike de Meza por splica dicon e por a aproba pa Richard Arends di AVP via su compania Horizon Consultancy a suta 600 mil pa conseha ken? Banda di esaki Mike de Meza himself a firma un contracto miyonario pa Richard bira CFO di RDA. 

Mike de Meza por splica cual ta e hotelnan cu a cobra respectivamente 338 mil, 318 mil, 270 mil, 197 mil, 179 mil, 31 mil pa un total di mas di  1.3 miyon pa kendenan tur a keda eyden? Mike de Meza por splica e balor agrega y ta pa ki trabou Tera Group di su amigo Patrick Paskel y Speed a cobra 400 mil na RDA? Ki tanto propaganda un Refineria tabata tin mester?  Mike por splica un otro consultant amigo di Mike & Mike a cobra 615 mil? Mike de Meza por splica uso di mas di 100 mil riba credit card di compania, ken a usa esaki y pakico? 

Mas y mas malgastamento

Mike de Meza por splica con un persona hopi yega na dje (Menshe) a cobra 200 mil op naam? Ki trabou el a haci? Mike de Meza por splica kico e balor agrega ta pa RDA paga Financieel Beheer Europe Meets the Americas 125 mil florin? Mike de Meza por splica cu si ta normal pa RDA sponser Green Conference 550 mil?  Mike de Meza por splica pueblo con por a pasa den un ex minister su cabes di “coco” pa malgasta 782 mil na 1 apertura cu “Destra Garcia and Band”? Pueblo ta sinti cu Mike de Meza ta fair cu pueblo? Esaki tabata e minister di finansas y minister di energia di Pais Aruba? Awor pueblo por compronde cu e hendenan aki no tin cunes ni cu placa di RDA y ni cu placa di pueblo. 

Segun Parlamentario Endy Croes ora e tende ex minister Mike de Meza papia e ta haya “bere bere”. Awor cu cos a bira berans y placa no ta core na cantidad mas, Mike de Meza kier bolbe pa salba ken? Mihor regalo cu pueblo por haya ta pa nunca pero nunca mas AVP bolbe na poder.  


Related posts

Minister Xiomara Maduro: Pueblo A Celebra Dia Di Betico Celebra Cu Un Magnifico Concierto Di Grupo Di Betico

EA News Author

Prome Minister Evelyn Wever-Croes: Empleadonan publico a ricibi certificacion di curso pa traha den maneho enfocando riba implementacion di SDGS

EA News Author

Consulta cu sonrisa pa cu e inicitiva pa un kinder-gehandicapten uitkering

EA News Author

Leave a Comment