Dia 4 di mei 2025 den Reino Hulandes ta conmemora tur esnan cu a perde nan bida durante e Segunda Guerra Mundial 80 aña pasa. Pa e ocasion Gobierno di Aruba a prepara un ceremonia special na unda cu Parlamentario Xiomara Maduro tabata presente den representacion di Fraccion di MEP den Parlamento.
Durante e ceremonia a tuma dos minuut di silencio pa recorda tur esnan cu a perde nan bida ta defende Reino Hulandes den Segunda Guerrq Mundial y tur otro conflicto den cual ta lucha pa paz prevalece. Na Aruba tambe nos heroenan di Schuterij Aruba tabata tin nan rol pa defende Aruba di e invasion di Nazi’s, y na Hulanda nos heroe Arubiano Boy Ecury a forma parti di e resistencia Hulandes y e tambe a sacrifica su bida pa awe nos tur por ta biba den libertad den Reino Hulandes.
Despues cu e grupo di mandatario, dignitario y invitado special a pone krans, Parlamentario Xiomara Maduro tambe a haya e opurtunidad pa demostra su respet y gratitud dilanti e monumento cu ta recorda nos di tur e fayecidonan den Segunda Guerra Mundial. E monumento aki y esun dedica na Schutterij y Vrijwilligerskorps Aruba ta situa den Adriaan Lacle Boulevard.