Gobierno ta sigui cu abuso di poder y persecucion politico
Diabierna ultimo 10 october, hues a dicta sentencia den e kortgeding cu 15 comisario di diferente companianan di utilidad a entama contra WEB, Elmar, AWSS, ARE y Utilities.
E Sentencia
En corto: E 15 comisarionan a gana nan caso sumario/ kortgeding. Hues ta schors e decision di retiro, e comisarionan mester wordo paga, nan mester por yega nan trabou y haya tur informacion pa nan haci nan trabou. Pa cada dia of parti di dia cu no cumpli cu e veredicto, tin un boet di 2500 florin cu un maximo di 250 mil florin pa cada un di e 15 comisarionan aki.
Algun punto importante
Segun Hues: un desicion pa kita un comisario mester wordo bon motiva. Bo mester trata na un manera drechi, naar redelijkheid en billijkheid, y no por djis hisa benta kita comisario sin duna motibo valido of djis bisa cu ta paso a bin un gobierno nobo y cu kier bay un otro rumbo, pesey no tin confiansa y no por traha cu e comisarionan riba e vision nobo.
Hues a dicta: cu no ta pasobra cu Gobierno a cambia of cu a bin cambio di director como representante di gobierno na Utilities, automaticamente bo por core kita e comisarionan cu a wordo apunta door di e gobierno saliente.
Hues a bisa: cu esnan cu ta pensa otro, ta pasobra nan no ta compronde of nan ta lubida cu un bestuur of Raad van Toezicht di un NV di gobierno tin cu haci su trabou na manera independiente, y cu Gobierno tampoco por dicta kico nan tin cu haci.
Persecucion politico
Cu otro palabra den e sentencia aki hues ta bati man di companianan di utilidad y ta manda mensahe cla y raspa na Ministernan Baba Herde y Dowers, cu nan no por yega kita hende djis pasobra un otro gobierno a pone nan eynan. Bo no por core cu comisario djis paso bo no ta confia nan.
Manera e comisarionan a bisa hues, aki ta trata di politieke zuivering, crioyo bisa, persecucion politico, y Hues a duna nan rason tambe. Ministernan Dowers y Baba Herde ta abusa di nan poder pa persigui comisarionan politicamente djis pasobra ta MEP a nombra nan. Bo ta haya cu Aruba ta bay dilanti asina aki?