Tin algo cu nos mester tene bon na cuenta, cu e mal spirito di arogancia y orguyo por ataca tur hende pasobra e ta disfrasa di hopi manera , hasta den orguyo spiritual.
Esey no ta nifica cu ta cierto hende so ta orguyoso y arogante, pero tur hende ta vulnerabel pa arogancia y orguyo.
Pasobra e mal influencia ta drenta den tur caminda cu e hanja un curason habri cu no tin temor di Dios.
Den bijbel tin dos homber cu tabata yena cu orguyo, arogancia y soberbia, nan nomber tabata cuminsa mesun cos, un tabata yama Namaan (2 Reynan 5:1-17), y otro yama Nabal (1Samuel 25:1-39).
Tur dos tabata orguyoso, Namaan a acepta e condicion di Dios pone pa su sanacion,y a wordo sana, pero Nabal a keda para den su maldad, arogancia,orguyo y soberbia y no a pidi despensa, y esey a causa su bida.
Arogancia ta pone hende perde bon amistad, pasobra arogancia ta pone bo trata hende malo, falta respet, y mas cu tur cos rechasa esnan cu realmente ta di bo.
Orguyo ta enemigo di Dios, Dios ta odia orguyo, pasobra ta pa motibo di orguyo cu angel a bira diabel y rebeldia contra Dios. Esey ta nifica cu ora un e hende ta orguyoso e ta biba den enemistad cu Dios.
Ora nos ta papia di sanacion, nos tin cu tene cuenta cu lo siguiente: Awendia nos tur ta na altura di e situacion di salud mental, cuanto depresion, stress y hende traumatisa tin ta biba hunto cu nos.
Pero locual ta sosode ta cu hopi no ta kere, cu nan salud mental ta depende di nan relacion cu Dios y nan prohimo, den cual nan tin cu sinja pordona, pa nan tambe wordo pordona.
Un cos ta masha importante pa hende pordona di curason ( Mateo 18:35), pasobra Dios no ta haci wega cu e asunto di pordon, y hopi biaha pa falta di pordon y no kier laga los di pasado, hende ta keda malo mental y fisico. Dios ta prohibi pa nos recorda cosnan di pasado.( Isaias 43:18-19).
E terapia di pordon ta Dios so por ofrece, pasobra e ta contene confesion na Dios, y pordona di curason esun cu a herida bo of cu abo a herida, pasobra ta solamente asina e lus di Dios, lo bolbe riba bo bida.
Pasobra mientras cu bo ta cana cu falta di pordon riba bo curason, bo ta cana den scuridad, y nos tur sa cu ora un hende ta cana den scuiridad tur sorto di cos malo por sosode den su bida.
Esun cu ta calumnia su prohimo den secreto, esey lo mi destrui,lo mi no soporta ningun hende cu tin mirada altanero (orguyoso) y un curason arogante.( Salmo 101:5).
E temor di Senjor, ta pa odia maldad, orguyo, arogancia,y mal caminda y un boca perverso mi ta odia.(Proverbionan 8:13).
E malbado cu su cara yen di orguyo, no ta busca Dios,Tur su pensamento ta, no tin Dios.( Salmo 10:4).
No laga ningun hende ganja su mes. Si un hende entre boso ta kere cu e ta sabi, den e siglo aki, lage bira bobo, pa e por bira sabi. Pasobra sabiduria di e mundo aki ta bobedad dilanti di Dios.( 1 Corintionan 3:18-19).
Pasobra tur loke cu tin den mundo, e deseo di carni,y e deseo di wowo,y e orguyo di bida, no ta bin di e Tata sino di e mundo.( 1 Juan 2:16).
Den arogancia y orguyo no tin nungun clase di ganashi tampoco crecemento.
Humildad semper lo hala nos mas serca Dios.