Tourism Corporation Bonaire (TCB) a duna rekonosementu na nuebe bishitante komo embahador di Boneiru. Shete di nan a risibí e honor aki den kategoria di bròns, oro i platina, miéntras un pareha a keda honrá komo embahador honorario.
Jan Claus i Agnieszka Pacholska di Bélgika ta bishitando Boneiru pa 10 aña konsekutivo. Nan ta enkantá ku e ambiente i e hendenan amabel di Boneiru. Nan a keda honrá ku feneta di bròns.
Den kategoria di oro a duna rekonosementu na Joël Arrigio di Suisa i tambe na Roger i Joan Luksik i Dave Kanarish di Merka. Tur ta bishitando Boneiru pa 20 aña konsekutivo.
Keith Dalton tambe di Merka a risibí honor pa 34 aña di bishita na Boneiru i a haña rekonosementu pa medio di un plakat di platina.
Bud Uren i Heather Sellick den pasado a keda honrá komo ‘platinum ambassador’, en bista ku na aña 2014 nan a selebrá 31 aña bishitando Boneiru. Dia 10 di novèmber último TCB a sorprendé nan en konekshon ku nan di 40 aña di bishita na Boneiru i a nombra nan komo embahador honorario di Boneiru. E pareha ta bishitá Boneiru dos bes pa aña i ta trese huntu ku nan un grupo di buseo. Entre nan tin algun miembro tambe ku a haña rekonosementu, esta Roger i Joan Luksik.
TCB ta felisitá tur e bishitantenan ku nan rekonosementu i Helen Mercera a gradisí nan pa nan eskoho pa bishitá Boneiru riba base anual.
