Durante tratamento di Segundo Cambio di Presupuesto 2023 Minister di Finansa Xiomara Maduro :
Danki na e esfuerso di profesionalnan Arubano, Aruba ta keda un baranca resiliente
Durante di e tratamento di e Segundo Cambio di Presupuesto 2023 den Parlamento, Minister di Finansa Xiomara Maduro a enfatisa cu tin pruebanan suficiente cu e maneho financiero di Pais Aruba ta riba bon caminda.
Economia di Aruba ta recuperando
Apenas tres aña despues di e pandemia mas grandi na mundo, Aruba su economia a cuminsa recupera grandemente. Den region Caribe, Pais Aruba ta e Pais cu su economia mas a wordo afecta, ya cu e unico fuente di entrada di turismo a cay afo. Hulanda a brinda nos Pais ayudo financiero y hunto cu e trabou duro di profesionalnan Arubiano a logra stabilisa y recupera nos economia mas lihe cu a wordo pronostica.
Resultadonan financiero positivo
E mandatario ta enfatisa cu e raportnan di tanto institutonan financiero internacional manera International Monetary Funds (IMF), rating bureaunan Fitch y Standard & Poor’s y tambe di instituto local manera Banco Central di Aruba, ta contene resultadonan positivo cu ta mustra e progreso economico y financiero di Aruba. Tur e raportnan aki ta publico y por lesa nan riba website di gobierno.aw
Balora esfuerso Arubano
Den su presentacion den Parlamento Minister Xiomara Maduro a trece dilanti cu e evaluacion positivonan aki di Aruba ta e resultado di trabou duro di nos profesionalnan cu ta kere y stima Pais Aruba. ‘No tin ningun otro hende cu por stima nos Pais mas cu nos mes. Historia a demostra un bes mas cu Aruba ta un baranca resiliente y cu hunto nos por traha na bienestar y progreso di nos Pais,’ tabata palabraban di e mandatario.
Aruba su finansa ta riba bon caminda
Apesar cu parlamentarionan den oposicion ta trata di malinforma nos comunidad durante e tratamento di e Presupuesto 2023, e rapportnan financiero di institutonan financiero internacional y local ta demostra otro. E mandatario ta enfatisa cu e ta maneha e finansa publico di Pais Aruba cu seriedad y disciplina. Como Pais nos mester duna reconocimento y yama danki na tur nos profesionalnan di e Departamentonan di Gobierno, Parlamento, Conseho di Minister y den comunidad en general. Danki na e esfuersonan haci, awe e finansa publico di Pais Aruba riba un bon caminda y Aruba ta keda un baranca resiliente.