E damnan rond di Aruba ta enfrentando un situacion precario. Actualmente, mayoria di e recursonan di awa aki ta practicamente bashi, loke ta haci e trabou di mantenshon di infrastructura mas crucial cu nunca. Autoridadnan ta eherciendo control estricto y ta haci un yamada urgente na comunidad pa evita comportacion cu ta afecta e capacidad di captura awa.
E damnan, cu ta hunga un rol importante den e recurso natural di awa riba e isla, ta den un estado cu ta demanda tension continuo. Segun informacion ricibi di vocero di Santa Rosa Randy Maduro, e damnan no ta djis un luga pa warda awa, sino un infrastructura cu mester di limpiesa constante pa por funciona optimalmente ora cu yobidanan yega. Pero actualmente tin e temporada di secura y ta tuma nota cu tur e dam nan ta seco y ta haci apelacion pa no benta sushi den e dam nan.
Un di e retonan mas grandi cu e damnan ta enfrenta ta e presencia di sushi tira na rand di e damnan. Ora cu ciudadanonan ta basha sushi den e areanan aki, e ta causa formacion di lodo cu, den un fase posterior, ta blokia e paso di awa. E situacion ta bira mas complica ora cu mashinnan pisa, manera tractor, mester drenta den e area pa haci e trabou di limpiesa. E lodo cu ta pega na e mashinnan aki ta haci e trabou di mantencion hopi mas dificil y costoso.
Santa Rosa ta enfatisa cu e accionnan aki di parti di publico ta contradictorio na e meta pa garantisa cu e damnan por capta e maximo cantidad di awa posibel ora cu tin yobida .”Nos ta pidi cooperacion urgente di tur ciudadano pa no tira sushi na rand di dam. Esaki ta esencial pa permiti cu e recurso natural aki wordo probecha optimalmente.
Awendia e agricultornan ta haya awa di WEB na un prijs preferencial debi cu nan ta agricultor y debi cu e dam nan ta seco.
Ora cu tin awaseronan fuerte, e damnan tin e potencial di capta cantidadnan significante di awa. Sinembargo, si e damnan no ta limpi of si tin obstaculonan manera sushi, e awa ta desvia y e oportunidad pa recuri e recurso natural aki ta bay perdi.
Pa e motibo aki, autoridadnan ta eherciendo mas control, incluyendo apelacion na publico, pa evita cu sushi ta keda tira na oria di damnan, un practica cu ta keda monitoriá seriamente.
Maske e damnan no ta ofrece un solucion den temporada di secura pa esnan cu ta depende di nan den forma mas grandi, e awa capta ta importante pa agricultornan chikito. Si tin yobida riba e areanan, e awanan capta por brinda alivio. E demanda di awa ta keda un tema constante pa e agricultornan local cu ta depende di e naturalesa, cual ta duna enfasis na e necesidad di mantencion di e damnan pa e por keda capta awa cada biaha cu tin e oportunidad.
