Na nòmber di CHATA, Ofisina di Turismo di Kòrsou (CTB), Ministerio di Desaroyo Ekonomiko (MEO) i Ministerio di Salubridat (GMN), un danki kaluroso ta bai na tur operadó di telefòn di e call center i tambe miembronan di CHATA, kende a kontribuí na e sentro di yamada di GGD. Ayera, danki na dòkter Izzy Gerstenbluth, GMN a ekstendé su apresio na tur operadó di telefòn di e sentro di yamada na Curaçao Marriott Beach Resort.
E sentro di yamada a keda harmá pa CHATA, CTB, MEO i GMN ku e proposito pa monitoriá bishitantenan ku ta drenta nos pais di Oropa. E operadonan di telefòn tabata yama e bishitantenan kada 2, 4, 8 i 14 dia pa monitoriá nan salú i asina perkurá ku nan ta sinti bon. Alrededor di 50 persona di 17 miembro di CHATA a sirbi komo operadó riba un base semanal, sigurando un monitoreo fuerte pa asina por a oumentá nos kapasidat pa risibí mas bishitante di afó.
Un danki ta bai na tur miembro di CHATA ku a kontribuí na esaki: Avila Beach Hotel, Avis Car Rental, Caribe Car Rentals, Corendon Mangrove Beach Resort, Delta Security Caribe, Dreams Curaçao Resort, Spa & Casino, Karakter Beach Restaurant, Kontiki Beach Resort Curaçao, Livingstone Jan Thiel Resort, Curaçao Marriott Beach Resort, Oasis Coral Estate Beach, Dive & Wellness Resort, Orco bank, Papagayo Curaçao, Renaissance Curaçao Resort & Casino, Sunscape Curaçao Resort, Spa & Casino i TUI.
