Presidente di Sindicato TOPA, Axcel Figaroa, ta informa cu el a ricibi varios carta di miembronan manifestando malcontento riba e decision di gobierno pa otorga un aumento di salario exclusivamente na ambtenaarnan den schaal 13 te cu 16.
Segun Figaroa, e sindicato a keda sorprendi cu e medida, pasobra segun su informacion, e aumento di dos periodiek a wordo concedi sin consulta previo cu e sindicatonan cu ta representa trahadonan publico. Normalmente, gobierno ta acerca sindicatonan pa dialogo ora tin intencion di haci cambionan cu ta toca posicion laboral y salario, pero segun TOPA, e biaha aki ningun sindicato no a wordo informa anticipadamente.
Falta di comunicacion cu sindicatonan
TOPA tin un cantidad considerabel di miembronan cu ta ocupa posicionnan di staf, manera director y “hoofd van dienst”, y e sindicato ta representa tambe nan interesnan. Figaroa a recorda cu dos aña pasa tabatin un proceso largo di negociacion riba indexering, unda cu diferente scenario a wordo analisa tumando na cuenta e subida di costo di bida. Sinembargo, awe ta resulta cu un aumento pa schaal 13 te 16 a wordo implementa sin cu sindicatonan a sinta na mesa.
Segun informacion cu ta circula, e decision lo tabata aproba caba den Conseho di Minister nan for di mei aña pasa, pero a bira publico recientemente. E actual coalicion Gobierno di Aruba AVP-FUTURO a confirma e aumento e aña aki.
Carta sin contesta
Na reaccion riba e situacion, sindicatonan SEPPA, SIMAR, SPA, SADA, SIMBA, FTA y TOPA hunto a manda un carta na gobierno dia 2 di februari. Te na momento di publicacion, sindicatonan indica cu nan no a ricibi ningun respuesta oficial, aunke, pa ley gobierno mester contesta corespondencia oficial denter di dos siman. Mas cu 24 dia a pasa sin reaccion formal, loke sindicatonan ta considera un falta di respet.
Sindicatonan ta pidi un reunion formal cu participacion di representante di Directie di Recurso Humano (DRH) y Directie di Finanzas pa haya claridad riba e criterio uza pa yega na e decision.
Discusion riba retencion di personal
Un di e argumento menciona como motivacion pa e aumento ta cu personanan den schaal 13 te 16 lo tabata considera pasa pa sector priva. No obstante, Figaroa, cu a traha 35 aña den servicio publico, ta pone duda riba e magnitud di e problema. Segun figaroa, den su experiencia solamente un number nunimo di 4 personal di staf a laga gobierno pa sector priva.
El a señala cu posicion huridico di un ambtenaar su beneficionan secundario ta generalmente mas faborabel cu den sector priva, loke ta haci cuestiona e necesidad di un medida exclusivo pa e grupo aki sin presentacion di dato concreto riba cuanto hende realmente tabata na punto di renuncia.
Preocupacion riba antecedentenan
TOPA tambe a recorda cu dos aña pasa cinco director a haya un aumento significativo di toelage, aumentando di 2x 25% cu ta cera 50% riba nan salario base, cu ta conta como pensiongrondslag. Esaki tin implicacion directo pa monto di pensioen futuro. Segun e sindicato, e decision aki tampoco no a wordo ampliamente discuti cu sindicatonan.
Yamanda pa transparencia
Sindicatonan ta enfatisa cu cambionan salarial cu ta toca cartera di trahadonan publico mester wordo discuti ampliamente y basa riba dato claro. Nan ta pidi gobierno pa presenta facts y fundamentacion concreto riba e decision di subi salario pa schaal 13 te 16.
Ademas, TOPA ta subraya cu e grupo mas grandi di ambtenaarnan esnan bou di schaal 13 – ta forma e “weso di lomba” di aparato gubernamental y segun e sindicato, tambe mester atencion den cualkier revision salarial futuro.
Cu un reunion di indexering pendiente, sindicatonan ta anticipa cu tema di salario di ambtenaarnan lo bira un punto central di discusion den dianan venidero.