Presidente di Sindicato TOPA, Axcel Figaroa, ta alerta cu e situacion na Korrektie Instituut Aruba (KIA) a yega na un punto critico y no por warda mas pa accion concreto. Segun Figaroa, e instituto correccional ta opera bou di presion extremo debi na un falta severo di personal y falta di inversion structural durante añanan consecutivo.
Actualmente, KIA tin 31 bewaker (cuidador di preso) y seis personal di beveileging pa cubri e operacion diario. No obstante, segun cifra presenta door di TOPA, e institucion mester aproximadamente 115 bewaker y 68 beveileging pa por funciona na un nivel adecua.
Pa mantene e operacion “drechi”, por lo menos 12 empleado mester traha overtime casi tur dia. Durante turno di mainta tin un deficit di 10 persona, mientras cu turno di atardiyi anochi tin cada un falta di seis persona.
Figaroa ta adverti cu e presion constante ta crea un ambiente di trabou cu ta caracterisa pa stress halto, AO-melding frecuente y limitacion den derecho pa vakantie of dia liber. “E situacion ta bira inhumano,” el a indica, refiriendo na impacto riba bienestar fisico y mental di personal.
Segun TOPA, e combinacion di escasez di personal y presion continuo ta crea un escenario peligroso unda cu “di un momento pa otro” algo serio por ocurre. E sindicato ta señala cu den cinco aña otro 12 bewaker lo bay cu pension, loke lo ta mas grave ainda e deficit actual.
Ademas di falta di personal, e condicion di e edificio mes ta forma parti di preocupacion. Figaroa ta recalca cu ningun gobierno cu a sinta te awor a pone KIA como prioridad real riba agenda nacional.
Presidente di TOPA a confirma cu diferente reunion y conversacion a tuma luga cu Ministerio di Husticia. Carta oficial a wordo manda y durante un reunion reciente tabatin cuatro punto concreto riba agenda. Sinembargo, segun Figaroa, e reunion a termina abruptamente debi na un situacion urgente di e mandatario, y no a sigui ningun contacto adicional.
Figaroa a menciona tambe cu algun aña atras a wordo coloca e prome piedra pa un nobo edificio di KIA na Barcadera, pero te na awe e proyecto no a wordo realisa.
Recientemente, Minister Arthur Dowers a haci un bishita na KIA. TOPA ta expresa speransa cu e minister a haya un impresion claro di e gravedad di e situacion y lo tuma medidanan urgente pa baha tension y garantisa siguridad tanto pa personal como pa detenidonan.
Sindicato TOPA ta haci un yamada directo na gobierno di Aruba pa inicia inversion inmediato den reclutamento di personal nobo y mehoramento structural. Segun Figaroa, e situacion na KIA tin añanan acumulando sin solucion concreto.
“Hopi reunion, hopi palabra, pero te awor ningun accion real,” presidente di TOPA a conclui, enfatisando cu e momento pa intervencion inmediato a yega prome cu e situacion escala for di control.
