Tourism Corporation Bonaire a rekonosé 7 persona komo embahador di Boneiru

Tourism Corporation Bonaire (TCB) a duna rekonosementu na 7 persona komo embahador di Boneiru.

E pareha Loryn i Alex Adkins a risibí rekonosementu komo embahador di Boneiru. E pareha ta bishitando Boneiru pa 15 aña konsekutivo. Na e okashon akí a otorgá nan e boton di plata korespondiente.

“Durante e añanan ku a transkurí, nos a hospedá na diferente akomodashon akí na Boneiru. For di hotèl, kompleho di apartamentu i tambe Airbnb.“ Esaki tabata palabranan di e pareha durante nan seremonia di rekonosementu.

Tambe a duna rekonosementu na Tom i Michelle Fry i tambe Robert L. Skiba Jr. den kategoria bròns. Nan ta bishitando Boneiru pa 11 aña.

Pareha Steven i Martha Katz tambe a risibí rekonosementu ku ta bishitando Boneiru pa 30 aña konsekutivo i a risibí un plakat platino.

Pa TCB, sra Helen Mercera a hiba palabra na nòmber di gerensia gradisiendo e embahadornan pa skohe Boneiru kada bes di nobo komo nan destinashon di vakansi i tambe pa yuda promové Boneiru awor komo embahador di nos isla den eksterior.

Riba e potrètnan por apresiá nos embahadornan den kompania di sra Mercera, despues di e seremonia di rekonosementu.