Featured Bonaire Internacional

Tourism Corporation Bonaire ta kompartí resultado preliminar di e ‘exit survey’ i un aktualisashon di aktividat krusero


Riba djárason 19 di yanüari 2022 Tourism Corporation Bonaire (TCB) a kontinuá ku su Siman di Merkadeo ku presentashon di resultado preliminar di e ‘exit survey’ i un aktualisashon di aktividatnan krusero. Meta general di e ‘exit survey’ ta pa analisá i evaluá e ‘Eksperensia Boneiru’ di nos bishitantenan. E propósito di e proyekto di kolekshon di dato akí ta pa akumulá informashon i karakterístikanan demográfiko i tambe informashon tokante komportashon di turista, nan eksperensianan, aktividatnan i motivashonnan i  nan manera di gasta sèn.

 

E informashon ku a kolektá ta basá riba e investigashon ku na  luna di sèptèmber 2021 a ranka sali ku un programa piloto i ku seguidamente a kontinuá te meimei di luna di desèmber 2021 den sala di salida di aeropuerto, dos biaha pa siman riba e dianan ku ta hopi drùk.

 

For di e promé resultadonan ta resultá ku bishitante for di e siguiente paisnan a partisipá na e ‘exit survey’: 52% for di Merka, 42% for di Hulanda, 3% for di Oropa (Bélgika, Alemania i Suisa), 1% for di área karibense i 1% for di Argentina.  E promedio di durashon di estadia pa merkado merikano ta 7 anochi, miéntras ku pa merkado hulandes nos a registrá 14 anochi. Kasi 60% di nos bishitantenan ta bishitante ku ta bini bèk i di esakinan 39% a yega di bishitá Boneiru mas ku dos biaha. Mayoria di e bishitantenan merikano a indiká ku e motibu mas importante pa nan bishita ta sambuyamentu, siguí pa trankilidat i relahamentu, miéntras pa bishitantenan hulandes trankilidat i relahamentu tabata e motibu mas prinsipal pa bishitá Boneiru, siguí pa sambuyamentu i otro aktividatnan riba laman.

 

Na fin di e promé kuartal di 2022 TCB lo finalisá e promé bista general berdadero di muestra di informashon di e ‘exit survey’. E meta ta pa lansa e ‘exit survey’ pa industria krusero den kurso di e di tres kuartal di 2022.

 

Durante e presentashon a duna un aktualisashon tambe tokante aktividat krusero. Dos barku krusero a bishitá nos isla na luna di sèptèmber i na luna di òktober 2021 tambe nos a risibí dos barku. Na luna di novèmber 2021 nos a risibí 17 barku krusero i na luna di desèmber 2021 27 barku krusero a bishitá nos isla. Pa motibu di e situashon mundial i regulashon di COVID, TCB a monitoriá un oumento di kanselashon di barku krusero.

 

E meta ta pa yega na un industria di turismo krusero ku ta tantu sostenibel komo lukrativo. Un turismo krusero basá riba kultura i naturalesa, ku ta kontribuí aktivamente na konservashon i desaroyo di nos patrimonio kultural i históriko, i alabes na protekshon i konservashon di nos ambiente natural.

Related posts

E tim di kampaña di Gwendell Mercelina Jr. a lansa un petishon úniko pa rekonosé e Hulandes Karibense ku tabata tin un kontribushon signifikante den Reino

EA News Author

Eric Wente a ofrece un lectura special di Wine Tasting na studiantenan di EPI

EA News Author

Alan Howell: Proyecto hotelero Secret’s ta birando un realidad caba

EA News Author

Leave a Comment