Featured Bonaire

Tourism Corporation Bonaire ta lansa “Bonaire Tourism Scholarship Program” nobo den kolaborashon ku Guardian Group Fatum


Invertí den nos kapital humano i inspirá un generashon nobo di profeshonalnan den turismo

Resientemente Tourism Corporation Bonaire (TCB) a firma un akuerdo di kolaborashon ku Guardian Group Fatum (GGF) pa konhuntamente lansa un inisiativa edukativo pa komunidat boneriano, titulá ‘The Bonaire Tourism Scholarship Program’. TCB a desaroyá e programa den kolaborashon ku Guardian Group Fatum.

E Bonaire Tourism Scholarship Program ta yuda funda kursonan individual di desaroyo profeshonal i kursonan akadémiko fultaim riba tur tereno di Hospitalidat i Maneho di Turismo pa programanan riba nivel di Associate (MBO), Bachelor i Master. E beka di estudio ta hasi posibel pa studiantenan i no-studiantenan meritorio pa alkansá nan metanan edukativo i profeshonal i pa realisá nan soño. Ademas e programa di beka di estudio ta hasi posibel pa e partisipantenan pa hasi uso di e posibilidatnan pa kontinuá ku nan desaroyo profeshonal. E beka di estudio akí ta un medio efektivo tambe pa mehorá tumamentu den servisio di hendenan lokal i stimulá preservashon i kresementu profeshonal den sektor turístiko di Boneiru.

Direktor di TCB Miles Mercera a bisa: ‘E bekanan di estudio ta ofresé nos hendenan e oportunidat pa sigui un estudio òf pa sigui desaroyá nan abilidatnan mas aleu. Nos medionan finansiero ku komo profeshonalnan hóben tin ora ta limitá, no tin mag di stroba nos pa alkansá nos potensial. Pa e motibu akí personalmente mi ta di opinion ku e programa akí lo habri oportunidatnan nobo pa hóbennan manera mi, ku na edat di 15 aña a kuminsá traha den un di e industrianan di mas dinámiko na mundu, sin e medionan finansiero, pero ku e mentalidat korekto i e pashon pa perseverá. Ta nos promé prioridat  pa hasi turismo i su oportunidatnan ekonómiko aksesibel pa tur hende. Den un mundu ku ta kambiando kontinuamente nos tin ku aspirá pa sòru ku nos ta mira enseñansa komo nos pasaporte pa futuro, pasobra mañan ta pertenesé na esnan ku ta prepará awe p’é.’

Den kolaborashon ku Guardian Group Fatum, TCB lo otorgá bekanan di estudio individual na minimalmente 10 partisipante pa kada aña akadémiko. E bekanan di estudio ta funda te ku $3000 pa kada aña akadémiko, dependiente di e tipo di programa ku e partisipante skohe i e partisipantenan lo risibí esaki den e promé aña di nan estudio. Ta otorgá e bekanan di estudio solamente pa paga e estudio i ta entregá e sèn direktamente na e universidat òf ‘hogeschool’. E beka pa estudio akí no ta un beka pa paga e gastu di estudio kompleto, e partisipantenan pues tur aña di nobo tin ku hasi un petishon pa risibí e beka di estudio.

E direktor di Guardian Group Fatum, Diego Frankel, ta konfirmá: ‘Profeshonalnan hóben tin nan futuro den nan man, ku e programa di beka di estudio akí Guardian Group ke aportá na desaroyo mas aleu di nos sektor turístiko. Mediante di duna yudansa awor ku ofresementu di oportunidatnan igual i akseso na e instrumentonan korekto den enseñansa, nos tin un mihó futuro na Boneiru. Nos ta kontentu di por forma parti di e Scholarship Program komo parti di nos responsabilidat sosial. Duna bèk na nos komunidat pa invertí den e biahe akadémiko di nos futuro profeshonalnan hóben ta un rekompensa pa nos tur.’      

Guardian Group Fatum’s Manager Marketing Dutch Caribbean, Djamila Braaf i Manager Sales Dutch Caribbean Sharon de Maaijer – Axson, nos embahadornan na Boneiru, ta kontentu di por traha huntu ku TCB pa sostené desaroyonan turístiko na nos isla: ‘Pa diferente motibu nos ta hopi entusiasmá tokante e kolaborashon ku TCB. Pero e echo ku nos por duna algu bèk tambe na komunidat, ta e chèri riba e bolo.’

Kon pa apliká?

Nos ta invitá nos hóbennan boneriano ku pashon pa turismo i ku tin sierto metanan nan dilanti i ku ta soña pa den futuro bira lider riba tereno di turismo na Boneiru, pa buska mas informashon tokante e ‘Bonaire Tourism Scholarship Program’ i registrá pa e programa akí pa e oportunidat di nan bida! Pa registrá i pa lesa mas tokante e tremendo inisiativa akí, bai riba www.bonairescholarship.com.

Related posts

Parlamentario Mc William: Gobièrnu mester laga hasi un investigashon riba kalidat di enseñansa na momento ku ta hasi uso di sistema virtual pa duna lès.

EA News Author

Un kaluroso bon bini na buelonan direkto di Merka

EA News Author

AVP no ta haci politica cu FASE pero ta guestiona e maneho di FASE

EA News Author

Leave a Comment