Tourism Corporation Bonaire (TCB) ta hopi kontentu di por anunsiá lansamentu di e ‘Capture Bonaire Photo Contest 2026’, un selebrashon anual di bunitesa, kultura i ambiente di nos isla pa medio di fotografia. Komo parti di e kampaña di verano di e aña akí, “A Different Kind of Summer – Un tipo di verano diferente”, e kompetensia ta invitá tantu habitantenan komo bishitantenan pa kapta i kompartí momentunan outéntiko ku ta reflehá e ambiente pasífiko, e bunitesa natural, e kultura vibrante, aventura na aire liber i Boneiru su estilo úniko di bida.
E kompetensia ta dura for di 19 di ougùstùs te ku 16 di sèptèmber 2026 i e ta enkurashá tur partisipante pa wak mas leu ku loke ta konosí kaba, i mustra imágennan ku ta destaká Boneiru for di perspektivanan nobo i inspirativo. Sea ku ta trata di un buseo impreshonante den nos laman kristalino, un salida di solo trankil a lo largo di e liña di kosta, nos flamingonan den nan habitat natural, un esena kolorido di kaya, òf un bahada di solo inolvidabel, kada potrèt tin ku konta e storia di loke ta hasi Boneiru un berdadero destinashon úniko di verano.
“Tur aña ku hopi plaser nos ta organisá e Capture Bonaire Photo Contest pa selebrá e beyesa i kultura inkreibel di nos isla. Potrèt tin e poder pa konta un historia i kapta momentunan i perspektivanan spesial ku no semper nos por ekspresá ku palabra so. Nos ta partikularmente entusiasmá ku partisipashon di nos komunidat lokal, banda di nos bishitantenan, ku ta kompartí nan propio bista riba Boneiru i mustra kiko ta hasi nos isla asina spesial. Nos ta spera ku pa medio di nan kreatividat nos por deskubrí imágennan bunita i outéntiko ku ta destaká Boneiru i e hopi eksperensianan ku ta sòru ku akinan nos tin un tipo di verano hopi diferente,” segun Elesiër Angel, direktor di Tourism Corporation Bonaire.
Kon pa partisipá
Partisipashon na e kompetensia ta habrí pa tur habitante i bishitante di Boneiru for di 18 aña bai ariba. Nos ta invitá partisipantenan pa manda nan potrètnan via www.bonaireisland.com/photo-contest/.
Ta husga e potrètnan pa loke ta trata kreatividat, komposishon i e abilidat pa presentá Boneiru na un manera nobo, inspirativo i signifikativo. Ta enkurashá tantu fotógrafo amatùr komo fotógrafo profeshonal pa partisipá.
Premio i anunsio di e ganadónan
E kompetensia ta dura kuater siman i dia 23 di sèptèmber 2026 ta anunsiá e ganadónan. E tres mihó potrètnan ta risibí e siguiente premionan:
Promé premio: Estadia den hotèl
Di dos premio: Eksperensiá un aktividat úniko
Di tres promio: Eksperensiá “lifestyle photo”
Ta publiká e potrètnan ganadó riba e plataformanan ofisial di TCB, entre otro riba www.bonaireisland.com, i TCB por usa nan tambe den futuro kampañanan di merkadeo pa promoshon di Boneiru su outentisidat, su kultura i su enkanto natural.
Pa e reglanan kompleto di kompetensia, kondishonnan i stipulashonnan, por fabor bishitá: www.bonaireisland.com/photo-contest/.
