No ta posibel mas pa biaha bai bin riba e mesun dia pa Kòrsou sin ku hasi un test di PCR. Entrante 23 di novèmber 2020 tur pasahero for di Kòrsou ku ta biaha pa Boneiru mester a laga hasi pa mas tardá 72 ora promé ku salida un tèst di PCR, resultado di e tèst mester ta positivo. Pasahero ku no a laga hasi un tèst di PCR, no por subi avion pa bai Boneiru.
Boneiru ta bini ku regla mas estrikto awor ku e kantidat di kaso di Covid -19 na Kòrsou a oumentá basta, na e isla ei tin awor 640 kaso di hende ku a pega ku e vírus. Na Boneiru tabatin delaster dos simannan seis kaso nobo di Covid-19 ku a bini aserka.Departamento di Salubridat Públiko sa unda fuente di e kasonan akí ta. E kasonan akí tin direktamente òf indirektamente di aber ku Kòrsou.
Pasahero ku ta bini Boneiru for di Kòrsou mester bai yena e Deklarashon di Salubridat Públiko digital entre 48 i 72 ora promé ku nan buelo. No ta aseptá deklarashon riba papel mas na yegada na Boneiru. Por yena e Deklarashon di Salú riba www.bonairepublichealth.org
En bista di e kantidat di kaso di hende ku a pega ku e vírùs na Kòrsou i Boneiru, ta konsehá pa biaha solamente si esei ta nesesario. Ta konsehá biahero di Boneiru ku ta bai den eksterior, pa tene nan mes na e reglanan di corona di e pais ei.
Si bo tin kayente di kurpa doló di garganta, òf otro keho ku por tin di aber ku corona, ta konsehá bo pa keda kas i yama 0800 0800. Ta importante pa tur hende tene nan mes na e reglanan di higiena, kome salú, keda den moveshon i drumi sufisiente.
PreveníCorona #coronaBonaire #coronaBoneiru.
