Djadumingu último M21 tabatin otro seshon di informashon. E biaha akí un di e gruponan tabata nos hendenan spesial ku limitashon di oido i defekto ku papiamentu. M21 a duna informashon na e grupo akí hasiendo uso di un intérprete pa lenguahe di seña.
Tabata hopi emoshonante pa mira kon e grupo akí tambe, ku kasi semper ta lubidá riba nan, tambe por a ekspresá nan mes kiko ta nan problemanan i nan retonan pa partisipá den nos komunidat.
E grupo aki nan bos a resoná pa medio di un intérprete/traduktor. Tambe a bin dilanti kiko nos hendenan spesial ku otro limitashonnan ta haña nan mes konfrontá kuné. Na base di tur e situashonnan akí ta nos sistema di enseñansa ku no ta duna espasio sufisiente na esunnan ku mester di atenshon spesial, pasobra enseñansa regular no tin hende ni tempu pa esunnan ku mester di atenshon spesial.
M21 ta kere ku mester bin ku un maneho pa solushoná esaki pasobra tur hende tin derecho riba oportunidatnan igual pa desaroyá na e manera ku nan por. Ningun hende no tin mag di keda tras. Pa nos di M21 asina e hende ta sentral.