Dia 21 di mei Fundacion Lanta Papiamento hunto cu Biblioteca Nacional Aruba a celebra 22 aña di oficialisacion di Papiamento. Un anochi espectacular caminda e sala principal tabata yen di hende. E anochi tabata yena cu sorpresa. Tabatin declamacion di poesia y poema, presentacion di musica riba piano di un hoben artista, como tambe e conocido Johnny Scharbaay, maestro riba piano, compaña cu dos musico y presentacion di dos baluarte den e lucha di Papiamento.
Ausencia di e mandatarionan
E celebracion di bo propio idioma su status, sigur ta algo cu tur mandatoria mester duna su atencion. Specialmente cu netamente Papiamento ta e instrumento esencial pa comunica y conecta cu bo hendenan. Ausencia na un celebracion asina, sigur ta trece incertidumbre y inkietud pa futuro di Papiamento den e gobernacion actual, unda cu netamente nan por a haya informacion balioso, sentimento y pensamento di un grupo grandi di experto, tocante nos idioma Papiamento. “Nos di fraccion di PPA lamentablemente no a mira ningun minister di gabinete actual presente. Esaki no ta un bon señal.” Eduard Pieters a indica.
Influencia colonial
Dr. Joyce Pereria a duna informacion conciso tocante kico a logra te awor cu Papiamento, pero tambe a subraya y sugeri kico pais Aruba mester haci ainda. Sra. Pereira a bay den historia di mas di 500 aña pasa y a yega te na 2025, pa ilustra con Papiamento a sa di sobrebibi tur e obstaculo- y contratiemponan. Ademas el a splica con profundo e influencia colonial ta den nos mente y cu esey ta stroba nos pa duna balor loke realmente ta di nos. Sin laga afor, cu netamente e influencia ey, tambe ta stroba nos pa progesa optimalmente den bida.
Idioma Caboverdeano y Papiamento
Sr. Ramon Todd Dandare tambe a duna informacion tocante su ultimo biahe na Cabo Verde y presentacion na Universidad di Cabo Verde. Sr. Todd Dandare a splica di e impacto di esclavitud riba e islanan di Cabo Verde. Pero tambe e gran semehansa y diferencia entre e idioma Caboverdeano y Papiamento. “Esnan cu a nace, biba y crece riba e islananan colonisa, mester pasa un proceso di decolonisacion pa por sigui progresa. Ningun hende por yuda nos den esaki sino ta nos mes. E prome paso ta reconoce cu nos ta colonisa.” Eduard Pieters a splica.
Casi na final di e anochi banda di otro personanan hopi importante den e lucha pa mihor status di Papiamento, Eduard Pieters, miembro actual di fraccion di PPA, como un persona cu ta sigui lucha pa Papiamento y ex presidente di e FLP, tambe a haya un reconocimento di e directiva di FLP. “ Mi compromiso ta pa hiba e discusionnan di Papiamento riba nivel politico. Mediante nos lider di fraccion di PPA den Parlamento di Aruba, Sr. Otmar Oduber, nos lo sa di defende, salvaguardia y promove e lucha incansabel pa hiba Papiamento padilanti y percura pa su existencia den tur sentido di palabra.” Eduard Pieters a finalisa bisando.
