Un yamada habrí na kreadónan lokal
Tourism Corporation Bonaire (TCB) a anunsiá un yamada habrí na fotógrafonan i videógrafonan profeshonal pa partisipa na un inisiativa nobo pa kontenido visual ku lo pone Boneiru su kultura vibrante, su naturalesa bírgen i su eksperensia outéntiko den spòtlait. E proyekto titulá “Bonaire Through Your Lens – Boneiru Atraves Di Bo Lèns” ta invitá profeshonalnan kreativo pa registrá pa un oportunidat pa bira un di nos profeshonalnan selektá ku lo pasa tur kaminda na nos isla pa kapturá kontenido original di potrèt i video.
E kreadónan selektá lo traha estrechamente huntu ku TCB pa dokumentá e diferente ofertanan di nos isla, for di e bichnan i parkenan nashonal bírgen te e tradishonnan kultural riku, e poblashon lokal i e eksperensianan impulsá pa aventura. E inisiativa akí ta forma parti di e strategia kontinuo di TCB pa promové Boneiru komo un destinashon sostenibel i indispensabel pa biaheronan for di rònt mundu, pa medio di mustra e atrakshonnan úniko di nos isla.
“E inisiativa akí ta bai tokante empoderashon di kreadónan lokal pa konta Boneiru su storia atraves di nan propio wowonan,” segun Elesiër Angel, direktor di Tourism Corporation Bonaire. “Nos isla ta yen di talento kreativo i pa medio di invertí den nan, nos no ta solamente kapturá kontenido outéntiko, pero nos ta fortifiká tambe nos kompromiso ku enbolbimentu di nos komunidat, konservashon di kultura i desaroyo sostenibel di turismo.”
Aspektonan mas importante di e proyekto:
Ta selektá fotógrafonan i videógrafonan profeshonal
Ta paga un kompensashon pa tur prestashon entregá
E kreadónan ta produsí potrèt i video di kalidat haltu pa TCB su aktividatnan di merkadeo
Ta invitá tur kreadó ku ta interesá pa yena e formulario ku nan informashonnan personal, nan portafolionan i un ‘pitch’ kòrtiku i kreativo riba www.bonaireisland.com/bonaire-through-your-lens.
E posibilidat akí ta habrí solamente pa talento lokal ku ta biba na Boneiru i TCB ta enkurashá kandidatonan ku diferente bèkgrount i estilo di konta storia pa registrá.
Tur kreadó mester entregá nan petishon promé ku 17 di òktober 2025. Un komishon di evaluashon di TCB ta hasi e selekshon definitivo i nan lo komuniká esaki direktamente ku e kreadónan selektá. Pa mas informashon tokante e oportunidat akí, bo por tuma kontakto ku nos via: marketing@bonaireisland.com.
