Gobierno di Boneiro no a cay, a pesar cu miembro di Eilandsraad Salma Serberie a entrega un carta oficial unda e ta anuncia su retiro for di fraccion di partido Demokraat. Cu e decision aki, Serberie lo sigui su trabou den Eilandsraad como miembro independiente.
Te na e momentonan aki, lider di partido Demokraat, Clark Abraham, a declara cu no tin claridad riba e motibo di e decision, ya cu ainda no a haya e oportunidad pa sinta papia cu Sra. Serberie. E rason pa su salida for di fraccion ta permanece desconoci.
Segun informacion cu a yega na nos redaccion, aunke Serberie a entrega su carta di retiro for di fraccion di Demokraat, e no a kita su sosten for di gobierno di Boneiro te na e momento aki. Esaki ta nifica cu e actual coalicion di gobierno ta keda intacto.
Sinembargo, no ta claro ainda si e situacion lo keda asina den e proximo dianan. Den caso cu Serberie dicidi pa kita su sosten for di gobierno, e mayoria den Eilandsraad por wordo afecta y gobierno por cay. Situacion politico na Boneiro ta wordo describi como tenso.
Lider di partido Demokraat a indica cu lo haci esfuersonan pa sinta y dialoga cu Salma Serberie, cu e meta di obtene mas claridad riba e circunstancianan cu a conduci na e decision aki y pa mira kico por soluciona, tur problema tin solucion.