Centro di Bario Dakota, bou liderasgo di Carlmichael Bikker, ta den pleno ehecucion di varios proyecto innovativo cu tin como meta principal e desaroyo intelectual y artistico di e hobennan den e bario. Entre e inversionnan mas destaca ta e creacion di un centro tecnologico y expansion di programanan musical.
Den un esfuerso pa sera e brecha digital, e centro ta den e fase final di instalacion di un “Computer Kamer”. E proyecto aki, coordina pa e docente experto Glendrick Ridderstap, lo fungi como un espacio di estudio caminda studiantenan cu no tin e medionan na cas por haya acceso na internet y tecnologia pa cumpli cu nan tareanan escolar.
Banda di tecnologia, Dakota lo bira un nucleo musical. Den un cooperacion cu Scol di Musica Rufo Wever, lo ofrece lesnan di musica, mientras cu pronto lo inicia tambe lesnan di steelpan completamente gratis pa e muchanan.
Pa loke ta e infraestructura, e renobacion di Plaza Frans dudu Adonis ta den su etapa final. Ademas, a instala un dak nobo riba e patio central, brindando un espacio fresco y proteha contra solo pa e hobennan por socialisa y studia den aire liber durante henter dia.
Pa sostene e proyectonan aki, e directiva ta keda organisa actividadnan manera e popular “Johnny Cake Night”. Instancianan of personanan cu kier aporta financieramente por haya e datonan bancario riba e pagina di Facebook “Centro di Bario y Deporte Dakota” of tuma contacto via telefon na 561-9700 of 567-7134. Cu e inversionnan aki, Centro di Bario Dakota ta reafirma su compromiso pa cultiva disciplina y talento den e generacion nobo.
