Sra. Richeline C. Joe a entrega 2 ehemplar di su buki ‘Kadena di bida’ na Biblioteca Nacional Aruba, diaranson ultimo. ‘Kadena di bida’ ta un coleccion di poema y cuenta cortico, basa riba suceso real den bida diario. Sra. Joe a entrega esakinan na bibliotecaria Gina Jie Sam Foek y pronto lo por fia e buki na biblioteca. Ademas e ta na benta na Plaza Bookshop.
Tin tanto cos cu a pasa, ta pasando y lo pasa ainda den nos bida. E tantisimo sucesonan aki ta conopa na otro y ta forma un cadena. E cadena di nos bida! Cada cadena di bida ta unico. Labor y tur locual ta relata cu esey, ta forma un parti real di nos ‘cadena di bida’. Nos tin di haber cu famia, amistad, conocir y persona cu ta djis pasahero den nos bida. Tur tin nan nificacion den nos bida. Cosnan cu ta pasa den mundo rond di nos y nos encuentro cu naturalesa, tambe ta un parti indispensabel den nos cadena di bida. E cadena di nos bida ta sigui forma su mes. Cada dia atrobe nos tin e oportunidad pa haci nos cadena di bida ainda mas bunita.
Richeline C. Joe (’57) ta sicologo y alabes hurista. El a skirbi diferente cuenta cortico y tambe varios poema. Den ‘Kadena di Bida’ sra. Richeline ta dibuta ofreciendo sucesonan di bida diario cu nos tur por reconoce. Sra. Richeline ta di Corsou y a bishita Aruba pa un presentacion special na Biblioteca Nacional Aruba.