Durante e reunion publico pa trata e Fondo di Inversion, parlamentario di fraccion di MEP, Endy Croes, a sali na cla pa contesta y coregi e insinuacionnan haci pa parlamentario Stephanie Sevinger. Croes a enfatisa cu mientras oposicion ta purba haci stunt político, nan lo responde semper cu hecho y documentonan oficial.
Segun Croes, e parlamentario di oposicion a desvia atencion deliberadamente door di papia di un suma di 9 miyon florin y tira palabra pa lider di fraccion y lider di MEP, Evelyn Wever-Croes, insinuando cu su tata tin algo di haber cu e placa aki sin splica nada debidamente.
Clarificacion tocante Hendrik Croes
Pa trece claridad completo riba e asunto aki, Endy Croes a duna un splicacion tocante e trayectorio di mr. Hendrik Croes:
“Hendrik Croes pa mas cu 40 aña a traha den abogacia, e ta respeta na Aruba, den Caribe y internacionalmente. E ta un meneer di 84 aña cu a baha cu pension basta aña pasa. Esaki a wordo publica oficialmente, ken ta e partners, y e no tin nada mas di haber cu e kantoor cu el a traha pa hopi aña.”
Parlamentario Endy Croes a expresa cu e ta haya lamentabel e manera cu un parlamentario hopi jong ta haci wega cu e tema aki sin ningun base.
Detayenan di Sentencia y Caso Avestruz
Endy Croes a sigui splica cu ora oposicion purba uza informacion incorecto, mester corda pueblo riba loke berdaderamente ta skirbi den e sentencia (vonnis) y e documentonan di Ministerio Público (OM) den Caso Avestruz:
Página 6 di e Sentencia: Croes a cita parti di e investigacion di e caso aki, caminda ta wordo señala con un prominente ex-minister Sevinger a uza su posicion pa laga amigonan bira rico (“vrienden stinkend rijk heeft laten worden”).
Embargo na Girobank: Den e investigacion, autoridadnan a pone man riba 2.4 miyon florin na Girobank na Corsou di e “man drechi” di Benny Sevinger, kende tambe a haya castigo.
E suma di 2.4 miyon florin ey a wordo uza pa paga pa construccion di un sistema di desague (drainage system), un gym, y drecha e cura na cas di Benny Sevinger.
“Nos ta bini cu feiten”
Den su conclusion, parlamentario Endy Croes a manda un mensahe cla pa e parlamentarionan cu kier haci wega político:
“Ta bon pa bin ariba y corda pueblo esaki. Ora parlamentarionan kier haci wega of stunt político, nos ta bini cu feiten cu ta den tur documento cu bo mes por lesa.”y no dies papia pa papia.