Despues di mas cu un aña di trabou intensivo y dedicacion, Partido Pueblo Arubano (PPA) ta preparando pa un momento historico den su trayectorio: e reapertura di su cas di partido na San Nicolas. Lider di e partido, Sr. Otmar Oduber, a duna un relato detaya di e progreso di e proyectonan di reconstruccion cu awe ta transformando den un simbolo di speransa, modernisacion y orguyo patriotico.
E trabou cu a cuminsa mas cu un aña pasa tabata pa motibo di e dañonan serio provoca pa e sushi y candela cu a tuma luga mas cu dos aña pasa. Loke a cuminsa como un intento pa drecha e dak, e luznan, y e columnanan di e cas di partido, a bira un proyecto di reconstruccion completo.
“No ta trata di un simpel renobacion, sino di un reconstruccion total. A kira e dak paden y lo cambie completamente,” e lider di PPA a splica.
E dak nobo aki a wordo instala cu material di isolacion y un sistema modernisa pa haci e edificio mas fresco, lo cual lo permiti pa uza menos airco. Durante e proceso aki, a crea un un espacio chikito pa sigura cu e personal y boluntario por a sigui opera y yuda e comunidad.
E logronan aki a bira realidad danki na e sosten incondicional di e pueblo cu a sigui contact y apoya e partido pa percura cu e reconstruccion no ta para.
Fase 1: Celebracion di 77 Aña y Presencia den Parlamento
E prome fase di e proyecto aki ta enfoca riba e prome seccion di e edificio grandi. Aki lo ubica un sala di reunion moderno y un museo chikito dedica pa recorda e historia y e logronan di e 77 añanan di existencia di PPA, cual ta wordo celebra cuminsando dia 23 di october aworaki.
E celebracion aki ta bin den un momento di gran orguyo, cu e regreso di PPA den Parlamento di Aruba representa pa e parlamentario sra. Edward Peters, kende ta ricibiendo reconocemento pa e bon trabou y comunicacion constante cu e pueblo.
“Unda cu nos ta den pueblo, nos ta scucha e bon trabou cu ta wordo haci. Mi ta sumamente orguyoso di e team aki den su totalidad,” Sr. Oduber a expresa.
E planificacion pa e prome fase ta debidamente stipula:
Luna di December: Lo tuma luga e apertura oficial cu e tradicional corte di cinta y tiramento di pagara dilanti e cas di partido.
Dia 3 di januari: PPA ta priminti di cuminsa oficialmente su dianan di trabou directo for di e Centro Patriotico na San Nicolas.
E decision pa mantene e cas di partido den e mesun local historico aki na San Nicolas tabata firme y consciente. San Nicolas ta e cas y e raiz unda e partido a wordo funda pa e visionario Juancho Yrausquin. PPA a resalta cu di e mesun manera cu Juancho a duna un bista pa e futuro di Aruba cuminsando cu e vision turistico cu a transforma e isla for di e temponan di cabrito te na e gran industria di awe e partido ta mantene e compromiso cu e pueblo cu a sostene for di su inicio.
Vision pa Futuro: Fase 2 y e Rol den Comunidad
E Centro Patriotico lo no sirbi unicamente como un espacio politico, sino como un centro habri pa full e pueblo di Aruba. E meta ta pa futuro generacionnan por bini, haya asistencia, y siña di e historia di e partido cu a pone e basenan di e Aruba moderno, for di proyeccionnan pa grandinan te na e desaroyo economico.
Despues di habri e portanan den luna di december y cuminsa e trabounan na januari, e proyecto lo pasa pa su Fase 2, unda lo expande mas ainda e edificionan pa sigura cu e centro por funciona a su maximo capacidad y duna servicio na e comunidad di Aruba den su totalidad.
Despues di dos decada di no tabata den parlamento, PPA ta reafirma su compromiso cu e pueblo, sintiendo un gran orguyo pa e trabou cu ta wordo haci awe den parlamento y preparando pa habri un capitulo nobo for di su cas renoba na San Nicolas.
