Featured Politica

Accion21 ta invita tur partido politico no-tradicional na conferencia ‘Uni Pa Aruba’ pa cuminsa fortalece cooperacion


Fraccion di Accion21 ta haci un yamado na tur partido politico no-tradicional pa un conferencia cu lo wordo organisa den luna di September 2022 cu e meta pa fortalece cooperacion entre partidonan y mira si ta existi posibilidad pa consolidacion. E conferencia tambe lo sirbi pa conscientisa y brinda informacion y data.

“…mas nos tarda den cambia di direccion, mas pueblo ta sufri. Berdad nos por varia den ki prescripcionnan nos kier aplica riba esey, pero realmente algo mester cambia, nos no por sigui riba e rumbo aki,” asina parlamentario y lider di fraccion Accion21, Miguel Mansur a declara dilanti di VNO e siman cu a pasa ora di entrega carta hunto cu coleganan di oposicion denunciando mal gobernacion di gobierno actual.  “E sinberguenseria no tin fin, y mi ta kere berdad ta momento pa pueblo lanta para y pone un fin na e sinberguenseria,” sr. Mansur a sigui expresa. 

E iniciativa pa e conferencia aki tin bastante tempo caba cu ta trahando riba dje. Ta importante pa tuma nota cu e 10 partidonan invita na e conferencia aki ta representa 19,575 voto di eleccion 2021, cual ta e di dos grupo di votadornan mas grandi. Actualmente tin 6010 voto cu no ta representa den parlamento, cual ta aproximadamente dos asiento, plus un restzetel. Sr. Mansur ta enfatisa cu e conferencia aki ta mastanto pa por bin cu un strategia pa miho representa e interesnan di e partidonan presente, y consecuentemente nan votadornan y pueblo en general. 

‘Uni Pa Aruba’ ta un iniciativa di fraccion Accion21, cu lo tuma lugar riba 15 di September 2022 den conference room di Aruba Surfside Marina cuminsando pa 7’or di anochi. Durante e prome parti di e conferencia aki lo presenta dato di eleccion 2021, sondeo cientifico haci pa Accion21 na Maart 2022, NoticiaCla su sondeo na Augustus 2022, y cuater puntonan crucial cu Accion21 lo kier logra. E meta di e conferencia ta pa fortalece cooperacion entre e partidonan no tradicional y mira si ta existi posibilidad pa consolidacion. Accion21 ta sugeri tur partido pa trece y presenta den e prome ronda e cuater puntonan mas crucial cu nan kier logra. Ta recomenda si ta posibel pa prepara un documento cu splicacion breve di e cuater puntonan, y sea trece 10 copia na e conferencia of manda esakinan via email adelanta pa por provee copia di nan.

No tin debate of critica
E conferencia ta limita unicamente na contribucion constructivo, locual kiermen cu no tin ningun debate ariba e diferente puntonan crucial, ni tampoco critica di esnan atendiendo. Accion21 ta extende su invitacion na e dies lider di partidonan no-tradicional cu a participa na eleccion 2021 pa asina cuminsa cu e trabaonan real pa sigui hiba Aruba pa dilanti. Cada lider por wordo acompaña pa un otro persona si ta desea, sea un otro candidato, miembro di bestuur of consehero. Sr. Mansur: “Ta spera boso considera participa, ja cu tin hopi manera cu por coopera miho incluyendo por ehempel por medio di checkers combina pa controla voto, etc,.’
Pa participa, ta haci peticion pa porfabor confirma presencia mas tarda Dialuna 5 di September 2022 cu e nomber di e persona cu lo ta acompañando e lider via email na fractie@accion21.com. Si tin un lider y/of partido cu no tin plan di participa den futuro eleccion, Accion21 ta haci e peticion pa por fabor comunica esey na nan pa por actualisa nan informacion

Related posts

E vacuna ta e instrument pa acelera recuperacion di nos economia, part II

EA News Author

AAA, Total Services y Ecotech ta colabora riba esfuersonan di maneho sostenibel di desperdicio pa AUA Airport

EA News Author

Minister Geoffrey Wever: Cumpra Local pa stimula nos empresanan local

EA News Author

Leave a Comment