Presidente di fundacion SIKI ta hopi preocupa y hopi tristo pa mira un biaha mas cu politiconan no ta respeta nan mes, e constitucion, ni e leynan di Pais Aruba. Al mes momento, no tin e respet debido pa e pueblo di Aruba y esaki no ta wordo duna na un manera digno.
Presidente di fundacion SIKI, Jayburtt Dijkhoff, ta indica cu den e conseho di Raad van Advies ta bon cla cu e Rijkswet HOFA ta un atake directo na e constitucion di Pais Aruba. Sinembargo, e hecho cu un Prome Minister den e caso aki Prome Minister Mike Eman ta baha for di su puesto ta algo historico, algo cu nunca a sosode. Un Prome Minister cu ta baha y laga e responsabilidad nan na un punto cu e pais tin mas mester di dje, ta un acto di bandona e encargonan. Esaki sigur no ta mustra un bon despedida di Prome Minister Mike Eman. Sinembargo, mester para keto un rato. den constitucion no tin nada regla pa e paso aki.
Presidente di fundacion SIKI a investiga e leynan di Aruba, pero lamentablemente no tin nada regla. Loke ta tradicion politico ta “shummel” y no ta cumpli cu palabracionnan, debi cu cada bes ta mira cambio tras di cambio di palabracionnan cu a wordo tuma durante añanan.
Segun Jayburtt Dijkhoff, e unico cos cu por cay bek riba dje ta e propio acuerdo di gobernacion. Tur hende por haya esaki riba e website di gobierno di Aruba. Riba e acuerdo di gobernacion tin solamente cuater nomber cu a forma e negosacion di coalicion AVP-FUTURO: Minister Mike Eman, Wendrick Cecilia, Gerlien Croes y Geoffrey Wever.
Si mester analisa loke ta pasando Prome Minister Mike Eman no tabata un “vote-getter”. Minister Wendrick Cecilia si , pero e indica cu awo a cuminsa su carera como politico; e no por bira Prome Minister y a honra Mike Eman pa bira Prome Minister, puesto cu e ta ocupa awe. Pero haciendo esaki, ya caba e reglanan di wega ta wordo cambia.
Awo Prome Minister Mike Eman a anuncia publicamente cu lo e retira y sali for di e funcion entrante prome di januari 2027. Esey kiermen cu mester busca un otro candidato. Pero con lo haci esaki? Si no tin regla ni specificacion, y lamentablemente durante 40 aña no a traha riba ningun sorto di protocol pa casonan asina.
Sinembargo, e acuerdo di gobernacion ta dicta cu un di e cuater nombernan aki ta esun cu ta representa no solamente nan partido, pero tambe un parti substancial di e pueblo votado. Segun Presidente di fundacion SIKI, dicon no ta puntra Prome Minister, Wendrick Cecilia, Gerlien Croes y Geoffrey Wever prome pa nan asumi e responsabilidad y bira e siguiente Prome Minister di Pais Aruba? Banda di esaki parlamento ta aproba esaki? Pueblo di Aruba ta aproba esaki ?
E funcion di Prome Minister ta un funcion di confiansa cu ta mara e coalicion hunto. Parlamento, cu e pueblo di Aruba a vota pe, mester duna e voto di confiansa na e siguiente Minister-President. Sinembargo, segun Jayburtt Dijkhoff, e movecionnan cu ta mira ta cu a bin cu un otro nomber cu ta “bula cabes” riba e tres personanan cu a firma e areglo di gobernacion, sin cu sa si parlamento ta aproba esaki.
Basicamente, si viola e acuerdo di gobernacion, ta bin dos pregunta padilanti: tin confiansa den e tres nombernan den e plan di gobernacion pa haya un candidato? Of pa nombra un otro candidato? Si no tin confiansa, practicamente tin mandato di pueblo ainda? Of Aruba ta na caminda pa un eleccion nobo na 2027?