Despues cu siman pasa a inicia cu e campeonato di futbol femenino Copa Aruba Bank Liga Oro 8×8 den stadion Frans Figaroa na Noord, dialuna anochi e ekiponan participando na e campeonato a bolbe mira accion. E weganan ta wordo hunga riba mitad veld.
Den e prome dos weganan Estrella a enfrenta RCA mientras Britannia 1 a enfrenta nan compatriotanan di Britannia 2.
RCA vs Estrella.
Den e wega di e tricolornan contra di e ekipo naranha, RCA a sali brabo y a anota trempan pa habri e marcador 1 – 0, pero Estrella no a baha cabes y rapidamente ta anota e gol di empate pa e 1 – 1. Despues di e gol di Estrella, RCA ta cuminsa tuma e iniciativa mas y ta comanda e partido. Aki nan ta anota varios gol mas mientras Estrella ta haya e net na un ocasion. Na final, RCA ta gana Estrella 6 – 2.
E golnan di RCA ta wordo anota pa Josrine Saladin cu 3 gol, Selena Solagnier, Christy Ann Brete y Izaline Angela tur tres cu un gol. Pa e ekipo di Estrella ta anota Serena Morisson y Jo Anny la Bega.
Britannia 1 vs Britannia 2
E wega entre e dos ekiponan di Britannia di Piedra Plat sin duda tabata uno bon cu hopi accion. A mustra cu un banda lo domina e otro banda pero e score final ta loke ta dicidi e partido. E atakenan di ambos banda tabata uno tras di otro cu tironan di leu y peligroso di Mylene Croes di un banda y Tari Doornkamp di e otro banda. E propio Doornkamp ta habri e marcador cu un tiro duro cu ta pega den skina pa e 1 – 0, pero Britannia 2 ta reacciona pa medio di Zahira van der Linden. Den e wega aki tanto Tari como Zahira ta anota 3 gol cada uno. Na final e wega ta empata 4 – 4.
Pa Britannia 1 ta anota Tarianne Doornkamp cu 3 gol y Krislaine Kelly cu un gol mientras pa Britannia 2 ta anota Zahira van der Linden cu 3 gol y Lisandra Fradl cu 1 gol
Tabata tin un wega mas cu a bay entre La Fama cu Riverplate. Aki e ekipo Savanetero ta logra un victoria di 4 – 1 riba e ekipo di Playa Pabou. E golnan di La Fama a bini diZyana Rodgers cu ta anota 3 gol mientras Ciney Flemming ta anota un gol.
