Un rico inversionista di Belgica di bitcoin kier crea un pueblito di milionario cu un caracter “libertario” y cu su propio sistema di ley riba un isla den Caribe, cerca Saba y Sint Eustatius.
Segun Financial Times, e compania di Olivier Janssens ta cumpra parti di e isla Nevis. E empresario tin plan pa funda un comunidad propio pa hende (rico) cu no gusta gobierno ni reglamento.
E costa sur di e isla tropical lo wordo desaroya cu villa, un hospital hipermoderno y clinicanan. Na cambio di e inversion aki, e homber belgico kier tin mas bos pa bisa den decisionnan, segun e articulo.
Riconan kier cambio den reglamento
E proyecto “Destiny” ya a wordo presenta na representantenan di mas of menos 12.000 habitante di e isla. Durante un conexion di video, Janssens a adverti cu e sistema di ley di Nevis mester wordo reforma, pasobra e riconan di mundo lo ke muda bay e area. Sin embargo, el a priminti cu na final el lo somete su mes na e sistema di ley nacional di Nevis.
Segun Financial Times, Janssens a contrata e firma famoso di arkitectura Skidmore, Owings and Merrill, e mes compania cu a diseña e nobo World Trade Center. Te awor, e diseñonan no a wordo mustra publicamente.
Si tin un video riba YouTube di e compania di Janssens, South Nevis Ltd. Cuanto e villa lo Costa pa “e happy few”, e homber belgico no kier revela na e periodico.
Idea di milhonarionan
E proyecto Destiny ta un idea di milhonarionan riba henter mundo cu kier establece nan propio estado (chikiyo) “libertario”. Inversionistanan manera Peter Thiel y Marc Andreessen, fundado di OpenAI Sam Altman, y Brian Armstrong, CEO di Coinbase, lo a pone hunto miyones di dollar na capital di riesgo pa realisa e soñonan aki.
Kico ta e “principio libertario”?
E comunidadnan nobo lo biba segun e principio libertario: libertad individual y autodeterminacion ta lo mas importante. Intervencion di gobierno mester ta minimal. Tambe ta valido e “principio di no- agresion”: violencia solamente ta permiti pa defende bo mes.
Segun e plan, e proyecto Destiny tambe lo proteha y amplia e naturalesa y e rif di coral rond di e isla.
Originalmente, libertarismo tabata un idea di banda robes: abolicion di capitalismo y propiedad priva. Awe dia, tin libertarismo di drechi, caminda e gobierno no ta mas cu un “wardado di anochi”. Un ehempel tabata dos aña pasa, ora Javier Milei a bira presidente di Argentina como e prome hefe di estado abiertamente libertario, y a haci hopi recorte den gasto di gobierno.
Isla Roatan
Na Honduras, ya for di tres aña tin un proyecto riba isla Roatan. E gobierno di e tempo ey a duna milionarionan Mericano libertad total y a señala e area rond di un pueblito di piscado. E proyecto Prospera a inverti 150 miyon dollar den e comunidad hopi pober y tabata promete 4.000 trabou. E prome edificionan ya ta para. Aki tambe e plan tabata pa crea un comunidad “autonomo” cu su mes reglanan y ley.
Pronto e habitantenan di Roatan a realisa cu e libertarionan lo tin libertad total, pero cu e libertad di movecion di e poblacion local lo wordo severamente limita si e milionarionan Mericano ta manda.
Awe Prospera ta den un conflicto fuerte cu e nobo gobernantenan, e habitantenan local y organisacionnan di naturalesa. Miljardonan di dollar den demanda ta wordo reclama di un banda y di otro.
Inyeccion di miyon
Ora e gobierno di Saint Kitts y Nevis a dicidi e verano pasa cu mester tin luga pa “proyectonan special”, Olivier Janssens a mira su oportunidad, segun Financial Times. E homber belgico ya a priminti pa inverti 50 miyon dolar den infrastructura di Nevis, bou di e condicion cu e proyecto sigui dilanti.
Sinembargo, e desaroyado nan a insisti cu nan mester por introduci un forma propio di husticia. E habitantenan di Nevis no ta contento cu esaki, specialmente despues di loke a pasa na Honduras. E Nevis Reformation Party (NRP) ta tin miedo cu e poblacion original lo sali perdiendo. Nan ta teme desplasamento riba e mercado di vivienda y cu nan lo mester entrega nan awa di bebe na e riconan nobo.
Janssens ta insisti cu e habitantenan no mester tin miedo y cu un berdadero paraiso riba tera por nase. Asina a keda publica den the Telegraaf y di Financial Times