Durante e último simannan ku a transkurí, Kòrsou ta den un “lockdown” total ku a kondusí ku hopi empresa chikitu i grandi ta haña nan mes forsa pa stòp ku nan aktividatnan komersial di ofresé servisio i produktonan na kliente. Konsekuensia di esaki ta ku Kòrsou lo konosé mas oumento di desempleo i mas pobresa na gran eskala. Esaki ta evidente si nos wak e kantidat grandi di hende ku ta akudí i buska ayudo den forma di pakete di kuminda.
Banda di kresementu di pobresa i strès mental kousá dor di COVID-19 i tambe e sentimentu di inseguridat finansiero pa ku futuro, ta pone ku mester aserka e problema di e COVID-19 aki di otro forma, esta di un forma pragmátiko. Ta un echo ku hende tin ku traha i duna servisio pa gana nan pan di kada dia, si esaki no ta posibel dor di e situashon ku a surgi, gobiernu mester pèrkurá pa e impakto aki riba negoshi i empresanan wòrdu minimalisá i/o remediá. E aserkamentu mester ta dirigí riba solushonnan konkreto riba término kòrtiku, esaki debí ku hendenan no por wanta mas i nos no por sinta wak kon mas negoshi i empresa ta sera nan porta.
Rònt mundu e problemátika di Covid-19 ta wòrdu analisá i medidanan pa operá i traha den e sirkunstansianan aki ta wòrdu evaluá. Kòrsou na e momento aki ta number un (1), pa ku e kantidat di hendenan ku a ser bakuná i Kòrsou ta den un posishon úniko pa kuminsá kambia su medidanan ku ta na vigor. Si nos ta number un (1) riba lista di hendenan bakuná, kiko gabinete Rhuggenaath ta warda pa tuma desishon meskos ku otro paisnan ku si a tuma akshonnan konkreto pa suavisá i habri ekonomia bek?
Kòrsou por siña for di nos hermana isla Aruba, kaminda 50% mas o ménos di e poblashon ta bakuná i Aruba a habri su ekonomia. Esei ta eksigí ku nos mester ta realístiko i tin un plan basá riba strategia di rekonosé e fuente di e vírus isolá i hasi “Contact Tests”. Teknologia ta duna nos e oportunidat di desaroyá esaki, por pensa p.e. riba introdukshon di un app ku tur hende por baha riba telefòn òf otro aparatonan inteligente i risibí tur informashon unda tin kontagio i unda a detektá e vírus. Un ehèmpel ta e sistema di “Singapore Trace Together app”. Pues, tin kaminda pa kana si nos ke solushon!
Pa loke ta trata nos aeropuerto i pa viaja pa nos pais, por bini ku medidanan/filternan mas severo. Esaki lo evitá ku lo nos por bolbe haña nos ku importashon di un of mas variante di e viro.
Pa loke ta trata komèrsio, por laga tur habri pero ku un sistema di sita (afspraak), kaminda gobiernu ta kontrolá ku na tur momentu tin e kantidat maximo den e entidat en kuestion. Esaki ya ta ser implementá na Hulanda. Nos ta di opinion ku mester hinka representashon di komèrsio tambe den e tin di krisis Covid-19.
E kontròl den nos servisionan di salubridat ta wòrdu optimalisá di manera ku nan lo kontribuí na bahada di kontagio. Na e manera aki por suavisá medidanan riba merkado i negoshinan chikitu por habri sin ningun problema. Si no duna oido na e faktornan di strès mental, inseguridat finansiero i ekspektativanan insigur pa futuro, nos lo sigui mira un kaida den nos ekonomia i den kas di famia.
Pues nos ke urgi Gabinete Rhuggenaath pa rekonsiderá e medidanan di un “Lock-Down” total, manera e ta implementá awor aki i yega na un balanse entre e metanan di Salubridat Públiko i e konsekuensianan Sosial-Ekonómiko i introdusí medidanan adaptá mas pronto ku ta posibel.
Kòrsou quo vadis?
1 comment