E Bestuurscollege di e cuerpo publico Boneiru (OLB) a expresa e siman aki su profundo aprecio pa e personal di SELIBON NV. Den un mensahe personal na e empleadonan, e Bestuurscollege a subraya cu e dedicacion di e team, especialmente bou di e circunstancianan desafiante di e añanan pasa, a sido di un balor incalculabel pa e isla. Como un gesto tangible di gratitud, un pachet special di fin di aña a wordo repartí na tur empleadonan e aña aki.
Segun e Bestuurscollege, e empleadonan den maneho di basura ta forma e columna vertebral di e sociedad boneirense. A pesar di circunstancianan di trabou hopi biaha dificil y recurso limita, e personal di SELIBON a sigui cuida dia tras dia pa higiene y habitabilidat di nos isla.
“Sin nan compromiso incansabel, e salud publico y e bunitesa natural di Boneiru lo tabata den peligro. Nan trabou ta esencial y merese nos mas grandi respeto,” segun gedeputeerde Abraham.
Inversion den Futuro
E Bestuurscollege ta reconose cu den e periodo pasa hopi a wordo pidi di e resistencia di e personal. P’esey, un trayecto cla a wordo inicia pa hasi SELIBON financieramente y operacionalmente saludable atrobe. Manera a wordo anuncia anteriormente, e OLB a hasi e promé inversionnan necesario e aña aki. Den e añanan binidero, e Bestuurscollege lo sigui invertí den e operacion y materialnan.
E meta di esnan inversion aki ta doble: optimisá e servicio na ciudadano y mehora e circunstancianan di trabou.
“E personal ta central den e proceso di renovacion aki. Nan mester por hasi nan trabou cu material moderno y den un ambiente sigur cu ta hasi husticia na nan profeshonalismo.”
Aprecio den Accion
Ademas di e inversionnan estructural den e compania, e Bestuurscollege tabata kier tambe pa gradici e empleadonan personalmente pa nan perseverancia den e aña pasa. Como reconocimiento pa nan trabou duru, un pachet di fin di aña a wordo entregá na henter e personal.
E Bestuurscollege ta cerra cu un bista yen di speransa pa futuro:
“Nos ta sigui conta cu boso pasion. Huntonan, cu respeto mutuo y e inversionnan necesario, nos ta traha riba un Boneiru mas bunita, mas limpi y mihó.