Hóbennan boneriano a haña oportunidat pa laga inspirá nan mes i pa siña mas tokante e industria krusero den kolaborashon ku Carnival

E bishita resien na e barku krusero Carnival Celebration, ofresé konhuntamente di parti di Tourism Corporation Bonaire (TCB), Buki di Pret, Akseso i Kuido di Hubentut (Jeugdzorg), a okashoná un chispa di entusiasmo serka e habitantenan hóben di Boneiru. Dia 16 di ougùstùs kasi 80 mucha entre 7 i 13 aña a haña un oportunidat spesial pa eksplorá un barku krusero i eksperensiá e vibrante Carnival Celebration djaserka. 

E evento tabata un meskla úniko di dibertishon i siñamentu. E muchanan a subi un barku krusero di bèrdat, nan a deskubrí e diferente sekshonnan i nan a haña sa mas tokante kon tur kos ta funshoná riba un barku krusero i tokante e mundu di hospitalidat.

Banda di esaki e partisipantenan por a tira un bista eksklusivo tras di kòrtina na momentu di e preparashonnan pa e bishita tantu sperá di Carnival Celebration na nos isla. E bista tras di kòrtina akí a laga nan mira e dedikashon i e trabou duru ku ta bini huntu pa krea e magia di Carnival.

Miles Mercera, direktor di TCB, a bisa: ‘Traha huntu ku Buki di Prèt pa e evento akí tabata un tremendo eksperensia. Ora bo ta testigu di e kuriosidat i entusiasmo di e muchanan, esaki ta fortifiká e importansia pa krea e tipo di eksperensianan akí. E eventonan akí tin un impakto permanente riba nos komunidat di hòben i ta inspirá nan pa eksplorá i soña en grande.’

Durante henter e dia siguridat tabata na promé lugá, ku profeshonalnan eksperto ku a sòru pa bienestar di kada mucha.

Tourism Corporation Bonaire ta aktivamente planiando un evento eksitante spesial pa mucha na luna di sèptèmber i durante e próksimo simannan lo kompartí mas detaye tokante e evento akí riba e kanalnan di medionan sosial.

Pa aktualisashon tokante eventonan i aktividatnan binidero, bai riba e wèpsait ofisial: www.bonaireisland.com.