Movementu 21 (M21) ta hasi un yamada na tur siudadano di Reino Hulandes — tantu na Hulanda Oropeo komo na Hulanda Karibense — pa tuma parti aktivo na e elekshon di Tweede Kamer di 29 di òktober 2025. Spesífikamente pa nos na Boneiru e elekshon akí ta un oportunidat históriko pa redefiní e papel di Hulanda Karibense den Reino, i pa traha huntu pa un futuro mas hustu, mas igual i berdaderamente komun. Despues di un analís profundo di e programanan di partido, prinsipionan i posishonnan di diferente partido polítiko den kontienda, M21 ta rekomendá un voto pa Volt Nederland. Nos ta basa nos desishon riba tres punto fundamental:
1. Un vishon polítiko ku ta koinsidí ku esun di M21: Volt ta representá un forma di hasi polítika moderno, honesto i ku vishon: un polítika basa riba solushon, hustisia sosial, sostenibilidat i transparensia. Meskos ku M21, Volt ta kere den demokrasia partisipativo, inovashon komo motor di progreso, i den e obligashon di polítika pa sirbi e pueblo i no interesnan partidario. Volt ta representá e spiritu di renobashon ku nos tur den Reino tin mester di dje.
2. Un kompromiso real ku Hulanda Karibense: Volt ta un di e poko partidonan polítiko ku a demostrá di ta komprendé ku Hulanda Karibense no ta un ekstenshon leu, sino un parti bibu i esensial di Reino Hulandes. Nan programa ta rekonosé ku Boneiru, Saba i Sint Eustatius mester haña oportunidat igual, invershon hustu i un trato ku ta demostrá rèspèt pa nos identidat, kultura i potensial humano. Pa Boneiru, un voto pa Volt ta nifiká un voto pa e dignidat polítiko di Hulanda Karibense, ku durante hopi tempu nan no a skucha ku e seriedat nesesario.
3. Un manera diferente di hasi polítika: Si nos sigui hasi mesun kos nos lo sigui haña mesun resultado. Volt ta representá un generashon nobo di liderazgo: étiko, bon prepará i komprometé ku bien komun. Mirando loke e polítika tradishonal ta kousa, Volt ta bini ku disposishon pa kolaborashon, rèspèt i resultadonan real. E ta e tipo di polítika ku M21 ta defendé: polítika ku ta uni, no dividí – polítika ku ta konstruí i no konfrontá.
Pa tur e motibunan aki, M21 ta konvensé ku un voto pa Volt ta un bon eskoho pa Boneiru. Un eskoho kaminda e relashon den Reino entre Hulanda Karibense i Hulanda Oropeo por ta basá riba hustisia, kolaborashon i rèspèt mutuo.
M21 ta pone su konfiansa den Volt, pasobra Volt ta pone su konfiansa den Boneiru.
Press release: Movementu 21 (M21)