Featured Curacao

Kòrsou lo ta sede pa un proyekto di apoyo humanitario i seguridat alimentisio pa region


‘Xploration OceanX’. E proyekto akí ta enserá un lancha ku ta kontené teknologianan di desalinamentu di awa hasiendo uso di energia renovabel pa produsí awa bebibel. Na momentu di un kalamidat den e region Karibe, ‘Xploration OceanX’ por nabegá bai e sitio di kalamidat pa duna asistensia di awa limpi pa bebe i pa otro usonan den e komunidat afektá. Durante sobrá di aña ku no tin kalamidat, e lancha akí ta stashoná na Kòrsou i por produsí awa pa uso den sektor di agrikultura, ‘landscaping’, i otro usonan.

E proyekto ‘Xploration OceanX’ a keda desaroyá pa sr. Berend van de Kraats i Hans Bouchier di Fundashon OceanX huntu ku stakeholdernan lokal den Ministerio di Desaroyo Ekonómiko (MEO), Ministerio di Salubridat Públiko, Medio Ambiente i Naturalesa (GMN), Ministerio di Asuntunan General (AZ) i tambe Aqualectra i vários Organisashon No-Gubernamental (NGO) tantu lokal komo regional.

E proyekto akí un biaha mas ta mustra ku Kòrsou su posishon geográfiko, rekursonan natural i awanan profundo den nos bahianan, ta habri e posibilidat pa nos tin aktividatnan pa desaroyo na un eskala regional. Kòrsou ta interesante tambe, mirando e manehonan ku nos Gobièrnu a bin ta hiba pa protehá nos laman di moda ku esaki por ta fuente di desaroyo duradero i bienestar pa nos pueblo.

Tur esakinan ta hasi Kòrsou atraktivo pa investigashon i pa nos fungi komo un laboratorio pa inovashonnan ku despues por keda repliká den otro regionnan i na otro islanan. Durante e bishita akí, e team di OceanX a papia ku Minister di GMN, Minister di Desaroyo Ekonómiko, Aqualectra i ku Komishon di Maneho Integral di Awa di Gobièrnu di Kòrsou. E proyekto ‘Xploration OceanX’ ta bai fasilitá manehonan di Gobièrnu di Kòrsou riba tereno di agrikultura, seguridat alimentisio (“Food Security”) i tambe ta fasilitá e trabounan pa Defensa di Marina Real di Reino na momentu ku nan tin ku duna apoyo humanitario den region di Karibe.

Fin di novèmber OceanX lo ta bèk pa tene un presentashon pa Konseho di Minister di Kòrsou i komienso di desèmber nan lo presentá pa Gobièrnu di Reino pa asina e proyekto por keda ehekutá. Si tur kos kana segun plan, ta premirá ku pa 2024 e lancha ta keda finalisá i lo keda stashoná na Kòrsou. For di aki, e solushon inovativo aki por keda repliká pa mas region den mundu.

Related posts

Infekshon ku bakteria strèptokòk grupo A na Boneiru

EA News Author

OAA ta yama bon bini na Gabinete WEVER-CROES II y prinsipalmente minister di enseyansa Endy Croes

EA News Author

Minister Dangui Oduber : 29% di esnan cu no ta vacuna riba 18 aña ta causante di 82% di tur esnan cu ta hospitalisa

EA News Author

Leave a Comment