Prome cu 10 di october 2010 gobierno central di Pais Antianan Hulandes y gobierno di Teritorio Insular di Corsou tabatin un debe na balor di NAf 5.3 biyon. Na aña 2010, na momento cu Gabinete Schotte (MFK, PS, MAN) a haci su entrada, 70% (NAf 3.7 biyon) di e debenan aki a keda sanea y a refinancia e 30% restante den forma di 5 bono cu a suma un montante di NAf 1.6 biyon.
Esakinan na un interes substancialmente mas abou cu e debe anterior. Esaki ta nifica cu riba 15 di october 2010, Pais Corsou a inicia cu un debe na balor di NAf 1.6 biyon enbes di NAf 5.3 biyon. Den e 23 lunanan cu Gabinete Schotte a sinta, di october 2010 te cu september 2012, nan NO a fia placa cerca Hulanda.
Contrario na locual parlamentario y lider politico di partido PAR a anuncia publicamente, Gabinete Schotte no a hinca Corsou den (extra) debenan cuantioso ni a kibra record den fia placa. Gabinete Schotte nunca a fia placa cerca Hulanda. E gabinetenan cu a sigui, si a fia y pone cu actualmente Pais Corsou tin un debe di NAf 3.4 biyon. E record di mas grandi ta e fiansa di NAf 1 biyon cu Gabinete Rhuggenaath a haci cerca Hulanda den cuadro di e pandemia di COVID-19. PAR a bay di acuerdo cu e Landspakket y di e forma aki a bende nos autonomia pa un saco di placa.
Na momento cu haci fiansa cerca Hulanda, nan ta mara esaki na condicion y Gobierno di Corsou mester haci cierto reforma nan. Hulanda ta vigila esaki severamente y cada kwartaal ta duna nos mandatarionan un cifra di rapport. Gobierno awor mester consulta cu Hulanda riba temanan cu segun nos Statuut normalmente nos mandatarionan mes por a dicidi riba dje.
Na momento cu un minister kier traha un plan van aanpak of un proposicion di ley, via Nationale Hervormingscommissie e dossierhouder (esun cu ta atende e facil) ta consulta cu e ambtenaar di ministerio di Binnenlandse Zaken en Koninkrijksrelaties (BZK). Te ora BZK duna luz berde, e minister por bay Conseho di Minister pa aprobacion. Despues e ta cana su caminda bay SER, RVA y despues numa e proposicion di ley ta yega Parlamento.
Partido PAR a mina nos autonomia como Pais dor di firma e Onderlinge Regeling Landspakket.
Na momento cu Gabinete Pisas II a sinta na aña 2021, a ricibi ayudo di likides di Hulanda na balor di NAf 244 miyon, pa motibo cu Gabinete Rhuggenaath a laga nos caha Nacional practicamente bashi. Servicio di impuesto pa aña no tabata pone aanslag y Ontvanger no tabata haci cobransa manera debe ser.
Manera ta conoci, pa e ultimo kwartaal di aña 2021 y aña 2022 completo no tabata necesario pa sigui haci fiansa pa Pais Corsou. Cada cuarta Hulanda ta puntra Gabinete Pisas II si nan kier sosten di likides (liquiditeitssteun) y minister Silvania ta nenga rotundamente.
Actualmente minister Silvania, hunto cu su ministerio y demas colaborado, ta haciendo su maximo esfuerso pa por refinancia e debenan cu e gabinetenan anterior incluso partido PAR a hinca Pais Corsou aden. Cu esaki nos por bisa cu MFK si a kibra record den stop di fia placa cerca Hulanda y den esfuersonan pa refinancia e debenan cu e gabinetenan anterior a crea pa Pais Corsou.
