ORANJESTAD, Aruba
Parlamentario Endy Croes ta hasi apelacion riba nos comunidad pa nos uni. Cu tur hende mirando den e mesun direcion luchando pa e mesun causa comun nos ta logra. Mundo henter ta den un crisis di corona virus unda nos a ricibi algun sigñal di nos Todo Poderoso. Ningun di nos ta compronde esaki ainda. Kiko e sigñalnan aki ta significa pa humanidad? Kiko e mensahe ta? Un dia nos lo compronde. Nos ta bringando un enemigo cu nos no por ni mira. Mihor forma pa bringe y controle ta pa Keda Cas! Stop di Plame! Parlamentario Endy Croes sinembargo ta precupa cu un porcentahe di nos propio hendenan no ta obedese ordo di nos gobierno y dirigentenan di nos pais. Nos tin un Minister Presidente Evelyn Wever Croes trahando incansabel dia y nochi pa proteha nos comunidad. Nos demas Ministernan tur trahando super duro dirigiendo e pais aki den momentonan sumamente dificil. Nos departamentonan y sigur DVG trahando incansabel. Nos personal trahando den salubridad hasiendo nan maximo esfuerso cu tiki descanso. Nos no kier ni pensa mes lokual ta tumando lugar na Italia y Spaña por ehempel. Unico cos cu pueblo mester aporta na dije ta Keda Cas y sigui instrucion. Si bo sali corda di mantene distancia, laba man, no sunchi y no braza. No bishita nos grandinan of esnan mas vunerabel. Pues no ta hopi lokual gobierno ta pidiendo y ta bogando pa pueblo por cumpli. Ban mustra nos grado di disciplina. Ban mustra nos sentido comun un pa cu otro. Ban mustra solidaridad pa cu otro. Momento nan dificil ta na caminda. Nos tur ta bay tin mester di otro riba e pida baranca aki pa hunto nos saca Aruba bek padilanti. Parlamentario Endy Croes ta hasi un plegaria na comunidad pa ban cumpli y hunto den harmonia nos traspasa e temponan dificil nos dilanti.
