Siman pasa, Parlamento a tene un reunion constructivo cu Organisacion di Enfermero di Aruba (ODEA). Segun Parlamentario Hendrik Tevreden, e encuentro aki no a sirbi solamente pa scucha e preocupacionnan di e sector, sino, mas importante ainda, pa tende nan vision pa e futuro di enfermeria na Aruba.
Mester inverti den hende, no djis den edificio y aparato
Tevreden a splica cu hopi biaha e debatenan publico ta enfoca riba hospitalnan, edificionan nobo, tecnologia y presupuesto. Pero despues di e reunion aki, el a enfatisa cu un mensahe a keda bon cla: e mayor inversion cu Aruba mester haci na e momentonan aki ta den hende.
E parlamentario a ratifica cu e enfermeronan ta e columna vertebral di nos sistema di salud. Nan ta e profesionalnan cu ta banda di e pashentnan 24 ora pa dia, shete dia pa siman. Tevreden a recorda cu durante e pandemia di COVID-19, Aruba a mira claramente con indispensabel nan labor ta, y el a conclui cu awor cu e crisis a pasa, e pais no por permiti pa e reconocemento ey disparce.
Tevreden a comparti cu loke mas a impact’e ta cu ODEA no a enfoca principalmente riba salario. El a splica cu e organisacion a papia riba temanan crucial manera desaroyo profesional, educacion continuo, calidad di cuido, e oportunidad pa crece den nan carera, prevencion di burnout y un miho planificacion pa nan futuro. E parlamentario a subraya cu esakinan ta temanan fundamental cu na final ta beneficia e pashent mes.
E necesidad urgente pa data y vision strategico
Un otro punto importante cu Tevreden a trece dilanti ta cu Aruba mester cuminsa pensa mas strategicamente riba su forsa laboral den salud. Nos mester tin bista riba e datonan fundamental:
Cuanto enfermero lo bay cu pensioen den e proximo dies añanan?
Cuanto studiante nos ta formando actualmente?
Den cua specialisacionnan nos falta profesional?
E parlamentario a adverti cu sin dato concreto y sin un planificacion structural, Aruba lo sigui reacciona riba e problemanan en bes di preveni nan.
Un aspecto fundamental den e vision aki ta cu e bos di enfermeria mester wordo scucha mas efectivamente den e proceso di formula e maneho di salud. Enfermeronan no ta simplemente ehecutor di maneho; nan ta biba e realidad diario di e sistema, y e experiencia practico ey cu nan tin un balor enorme pa cualkier reforma.
Vision Salud 2035: Un sistema fuerte ta wordo construi cu hende
Den e contexto aki, e reunion cu ODEA ta representa un paso clave den e construccion di Vision Salud Aruba 2035. Esaki ta un plan integral cu e pais falta actualmente, pero cu ta altamente necesario pa traha riba un roadmap nacional cu ta integra e conocemento, e experiencia y e propuestanan di tur e stakeholdernan den sector di salud.
E parlamentario a enfatisa cu e meta no ta pa crea un plan partidista, sino pa contribui na un vision nacional cu ta pone e pashent central, ta fortalece e profesionalnan y ta prepara Aruba pa e retonan di e proximo decada.
Tevreden a finalisa bisando cu un sistema di salud fuerte no ta wordo construi solamente cu edificio of aparato moderno, y tampoco a base di critica. Un berdadero sistema fuerte ta wordo construi cu profesionalnan prepara, motiva y debidamente balora pa e trabou extraordinario cu nan ta ehecuta tur dia.