Bida ta un coleccion di experiencianan, nan frecuencia y nan intensidad. E experiencia pandemico aki tawata uno intensivo. Laga nos spera cu e no lo ta frecuente. Durante tratamento di e reunion di e ley di FASE den parlamento a bini dilanti cu ta tin falta di control, na otorgacion di fase na pueblo y cu tin algun cos cu a cana robes.
Nos ta sali splica cu enberdad tawata tin algun cos cu a bay robes, manera hende nan cu a fayece di Covid ora tawata haya fase, y nan famia a ricibi algun pago mas despues di esey. Tin algun hende cu a haya pago dobbel un o mas luna. Y otronan cu a purba na abusa di e sistema y hasta algun cu no a haya ayudo di fase, segun Controlaria General. E conclusion ta cu como tawata falta mas control, e riesgo lo a existi pa fraude y corupcion. Pero e realidad ta cu tawata un situacion di emergencia cu ta tin un impacto grandi riba nos pais. Gobierno mester a trece un ayudo den un tempo cortico, bou di un presion enorme y cu poco empleado. Basta famianan a keda sin entrada. Tawata reina un panico tremendo tanto medico y financiero. Pesey IMF – article 4 – ta haci conoci cu gobierno di Aruba a actua liher y esey a scapa economia di nos pais y a salba bida di hende. Elogiando asina e pasonan cu a wordo tuma den e pandemia pa gobierno. Pesey nos ta di opinion cu fase tawata un ayudo pa hopi hende nos comunidad durante e crisis.
Pero ban bek un rato. 13 di maart e prome dos casonan di covid 19 a wordo diagnostica na Aruba. E panico di loke cu nos tawata mira riba TV internacional a yega cerca. E prome scolnan a sera y algun hende ya caba a wordo manda cas di trabou. 16 di maart a sera tur otro scolnan, pero tambe a sera frontera di Aruba cu tur otro pais. 19 di maart a pone toque de queda y shelter in place. Y e demas retironan a cay y pa mei fase a start. Los di esaki tambe ta tin e reto grandi pa mantene e orden publico, pesey a introduci toque de queda pa ehecuta y controla e asunto y plamamento di e covid. Economia di nos pais a cay den otro, finansas publico no tawata conoce un buffer financiero como cu, e debe nacional tawata hopi halto. Un calculacion di 24 mil hende sin trabou, economia familiar a conoce un caos, mester a introduci pakete di cuminda, amplia e lista di onderstand y hasta algun hende yudanan cu shelter. Bou e circumstancianan aki gobierno mester a actua siendo cu esnan cu tin e capacidad huridico tecnico tabata ocupa cu Raft y cu Coho.
Fase a concentra pa yuda miles di hende entre otro taxi chauffeur, busnan chikito, y hoteleronan principalmente cu hotel a manda cas. Un ayudo cu a yega rapido y cu no a warda riba e cuadro di ley den e crisis pa ehecuta esaki. Pesey awe cu a verifica den sala tur e puntonan nos a pasa e ley y finalisa e proceso aki. E realidad ta cu e a tarda pero awor e ley tey. Nos tur tabata kier pa e ley a bin mas liher, pero circumstancianan menciona a pone cu esaki a tarda.