ORANJESTAD, Aruba
Un Reunion fructifero cu sr. Armand Hessels di Stichting Deugdelijk Bestuur Aruba. A papia riba diferente topico manera entre otro con nan ta percibi e maneho financiero actual y e proceso pa implementa un “National Integrity System”.
NATIONAL INTEGRITY SYSTEM
Manera ta conoci algun tempo pasa Prome Minister sra.mr. Evelyn Wever-Croes a firma un “memorandum of understanding” cu Stichting Deugdelijk Bestuur Aruba pa yega na un “National Integrity System”. Esaki sigur ta un paso significante pa fortifica practicanan di bon gobernacion. Den cuadro di esaki tin cooperacion cu Saxion Hogeschool, cual ta un di e Institutonan renombra riba e materia aki. Ya caba a inicia e investigacion aki y 15 di April e profesornan en cuestion lo ta na Aruba pa papia cu diferente “stakeholders”, entre otro Gobierno y Parlamento.
INVITACION PA SIMPOSIO
Durante reunion sr. Hessels a extende un invitacion oficial pa participa na un simposio na fin di aña. Un tremendo iniciativa cu lo atende aspectonan manera modelonan democratico, cultura politico y gubernamental. E simposio aki lo conta tambe cu contribucion di profesornan di Universidad di Leiden.
PA CONCLUI
Na final di e reunion no por a keda sin toca e parti di Aruba su finanzas publico. Sr. Hessels a duna di conoce cu ela tuma nota di e reaccion di CAFT riba e cifranan di realisacion di 2019. Apesar cu sr. Hessels ta boga pa mas atencion pa gastonan di personal, e ta enfatisa cu e reaccion tawata positivo y cu e mes tambe ta haya esaki positivo. Den e reaccion di CAFT a wordo subraya cu Gabinete Wever-Croes a uza 33 miyon florin menos di locual tawata presupuesta y tambe gasto di personal a baha.
