Festival Un Canto pa Aruba su Himno y Bandera
Pa tres (3) dia largo riba un Plaza Libertador Betico Croes completamente yen, caminda nos orea y wowonan a keda caricia. Un stage caminda nos por a experencia un showcase di talento y creatividad cu ta yena bo cu orguyo. Nos por a scucha letranan cu a subraya nos amor patrio, cu mensahenan positivo y tin ora di preocupacion, cu a accentua nos historia y tradicion. Alabes a scucha melodia y voznan cu a haci un cos cu bo, si no ta di para keto reflecciona, bo a haya un gana di baila y ripiti yen di smaak. Nos por a mira trahenan masha bunita yena di creatividad. Un verdadero espectáculo. Tres dia di kita sombre. Banda di esaki nos por a goza di tentnan ofreciendo cuminda criollo, boca dushi y mucho mas. Enberdad Aruba ta bendiciona cu asina hopi hende cu ta domina e arte culinario tremendamente, sigur esun tradicional crioyo.
Poeta di Patria
Dia 15 di maart den Cas di Cultura a tuma lugar pa di 9 biaha e competencia Poeta di Patria. En total 31 poeta a inscribi. Sigur un poema ta un manera masha profundo di expresion. Un bunita anochi yena di frasenan bunita accentuando e amor pa nos isla, orguyo di ta un Arubiano, historia y tradicion, custumbernan, preocupacion y mucho mas. Sigur un manera hopi bunita pa comparti pensamento, sentimento y mas cu tur cos e amor pa nos dushi pais Aruba. Tremendo anochi.
Manifestacion Cultural dia 17 di maart
Durante e manifestacion cultural dia 17 di maart anochi nos por a experencia un tremendo concierto. Un combinacion perfecto di cancionnan bieu y nobo, di musica y baile, di historia combina cu arte visual. Durante e show, nos por a mira den e dak di e stage di Palza Betico frase y potretnan ta keda proyecta. Esaki a complementa e show tremendamente caminda nos por a experencia un combinacion di arte cu a duna e show un toke unico. Riba e escenario di Plaza Betico por a mira diferente imagen di nos baluartenan, paisahe, simbolonan y nos flora y fauna cu a trece un dimension extra na cada presentacion di nos artistanan local. E proyeccion di e caranan di nos baluartenan cultural riba escenario na momento cu e show y canto di homenahe tabata tuma luga, tabata impresionante y a causa hopi emocion bunita. Banda di tur loke tabata tuma lugar riba escenario pueblo por a goza un biaha mas di tentnan yena di cuminda y boca dushi, artesania y mucho mas. Sigur un anochi cu tabata un exito total.
Gradicimento y felicitacion
Como un Parlamentario cu ta stima su cultura y semper ta sostene e actividadnan riba e tereno aki, mi kier a gradici y felicita e organisadornan di cada un di e actividadnan aki: Comision Promove Cultura, Fundacion Cultural di Festivalnan Folklorico, Gobierno di Aruba, DCA y Arte di Palabra y Comision Celebracion Dianan Nacional. Na tur boluntario c uta traha di curason masha masha danki.
Mas cu claro mester yama danki na tur poeta, cantante, bailado, musico, compositor y areglista y tambe e maestronan di ceremonia cu a haci tur e actividadnan posibel. Un palabra di felicitacion na tur e ganadornan. Por ultimo mi kier yama danki tambe na e publico cu a asisti y a sostene tur e actividadnan. Hunto nos a haci e celebracion di nos Dia di Himno y Bandera uno grandi.
