Un homenahe na amor i balor pa hende muhe
ACE Foundation ta sumamente kontentu pa anunsiá ku nos artista nobo, Farellis Domacassee, ku ta actua bou di nomber artístiko Fary, ta kla pa lansa su prome kantika titulá “E Konekshon”, huntu ku su videoclip. E lansamentu ofisial di kantika i videoclip lo tuma lugá djabierne, 9 di mei 18:00, riba tur emisora di radio na Boneiru i simultaneamente riba YouTube via e kanal Career Music @CAREERBONAIRE.
E kantika ta trata un tema profundo: e konekshon emoshonal i spiritual entre un homber i un muhe, kiko ta uni nan, kiko ta pone nan yega na desishon pa uni den matrimonio. Fary, huntu ku su mentor i su team di produkshion, a skohe un estilo soul old school, ku un toke diferente pa reflehá amor real, respeto i balor pa e hende muhe den un relashon.
E videoclip mes ta traha den un ambiente di antes, pa transportá nos bek na un tempu kaminda balornan di amor i respet tabata mas visibel. Fary ta desea pa su kantikanan
empodera e hende muhe, stimula nan pa sinti nan balor, i duna nan kurashi pa kere den
nan mes.
“Lo mi ke ta un kantante ku lo kanta kantikanan ku ta empodera e hende muhe,” Fary a bisa. “Kantikanan ku lo konsientisa, krea e esensia di ta sigur di bo mes den tur stap di bida. Mi siguiente kantika ku lo sali pronto i ta titula ‘Don’t Give Up’.”
Fary tambe tin e deseo di trese bek ritmonan ku nos a lubida, eksperimentando ku
diferente estilo musikal pa krea variashon i nostalgia.
ACE Foundation ta invitá tur hende pa sintonisá djarason i duna sosten na Fary dor di share su kantika, pidié na radio i sigui sigui stima talento lokal. E produkshon aki ta parti di e projekto Career di ACE Foundation, finansia ku apoyo di Fonds Podiumkunsten, ku a skohe ACE pa hasi e proyekto piloto aki, spesial pa forma artista nobo riba Boneiru.
Bo ta kla pa sinti e konekshon? Sintonisá riba radio djabierne 9 di mei, 18:00, i wak e video clip riba YouTube.