Señora Lilly Marlene Peterson MA Museologia ta laga sa cu e proyecto “Caquetio, Africano, Europeano: Nos tur ta un famia!” tabata un gran exito. E proyecto ta parti di e programacion di e aña di conmemoracion di e Historia di Sclavitud transatlantico Hulandes di e reino
Hulandes cu a tuma luga na Aruba. E proyecto a cuminsa dia 8 di november 2023 y a finalisa dia 8 di november 2024. Durante un aña señora Lilly Marlene Peterson MA a pasa bario pa bario dunando un charla y tayer riba e tematica di sclavitud transatlantico di Aruba; curashando hende pa busca nan ancestornan den e registro di catibo digital di Aruba. Aki algun resultado di e proyecto y websites pa bo mes por busca.
Un total di 365 persona a participa den e proyecto di locual 311 tabata un adulto mayor entre e edad di 60 pa 97 aña cu a nace riba un di e ABC islanan. 63% di e participantenan a laga sa cu nan a busca nan famia, cu tabata sclavisa of cu tabata tin esclavo aki na Aruba, den nos registro di catibo nacional.
E meta principal di e proyecto aki tabata pa traha un video di cuater minuut pa inspira e adulto mayor pa busca nan famia den e registro di catibo digital di Aruba uzando nan celular. 81% di e participantenan a reacciona positivo riba e video, nan a bira entusiasma ora nan a wak e video. Tin cu a asta yora pa via cu nan a sinti nan mes balora y honra cu e video cu a wordo traha special pa nan. Dia 7 di november señora Peterson a entrega un USB stick cu e video na señor Edric Croes, di Archivo Nacional y awo tur hende por subi e website di Coleccion Aruba pa wak e video: Nos tur ta un famia!
Un di e metanan di e proyecto tabata pa duna 30 presentacion. A logra di duna 28 presentacion; esaki ta 93% di e logro. Señora Peterson ta masha contento cu e logro aki. 93% ta e ekivalente di un 9 riba un rapport di scol. Y un 9 ta un bunita rapport- cijfer. E presentacionnan a wordo duna den seis di nos districtonan na Aruba. E districtonan ta dividi den 55 bario di locual 51 tin hende ta biba. Den cada un di e barionan aki tin por lo menos un persona cu a participa den e proyecto. Asina e informacion a wordo plama ful rond di Aruba.
Banda di e presentacionnan den bario unda cu e adultonan mayor por a participa den e proyecto y papia personalmente cu sra. Peterson. Señora Peterson a laga pone diferente articulo den diferente corant, el a papia riba radio, Facebook y na television den e programa “Nos Mainta”.
Un otro meta tabata pa haya por lo menos 25 persona busca den e registro di catibo digital y
informa señora Peterson di esaki. 278 (89%) persona a laga sa cu nan lo comprati e informacion cu
nan a haya cu nan famia.
Cu e buskeda den registro di catibo 38% a laga sa cu nan ta descendiente di esclavo. Algun a yora ora nan a haya nan famia den e registro, algun a rabia cu nan a wordo discrimina y hasta tabata tin hende cu tabatata desapunta cu nan no ta mara na sclavitud di Aruba. Cu e buskeda 17%
a laga sa cu nan ta descendiente di esnan cu tabata tin esclavo y 45% no sa con nan ta mara na sclavitud. Cu un parti di e hendenan cu a busca den registro no sa, tin un
parti di haber cu e tempo cortico cu nan a haya pa busca, cu e matrimonio di e doño esta e shon cu su esclavo. Asina esun cu tabata sclavisa a haya e nomber di nan doño y nan
nomber cu nan a haya na liberacion bai perdi. Haya sa bo identidad y bira y keda doño di bo propio
storia y historia. Busca den e database riba e website www.coleccion.aw/database, yena bo fam y primi e boton “Busca”. E database ta duna bo e cantidad di persona cu tabata sclavisa; mira cuanto resultado tin. Si bo a haya un lista cu nomber, e nombernan na bo man robes ta e nombernan di e personanan cu tabata sclavisa; banda di esey bo ta haya e aña cu e persona a nace; e nomber di su mama; algun suceso cu a tuma lugar manera: benta, findishi, manumision, y e nomber
di su doño/shon. Cu e nomber di e mama bo por sigui busca otro miembro di famia djis primi riba e
nomber di e mama. Tambe por busca riba otro isla manera Boneiro, pais manera Venezuela y trabou manera “labadora” of “cunukero”.
Pa esnan cu su hendenan no a nace na Aruba por busca informacion den www.wiewaswie.nl y den e
Archivo Nacional di Hulanda esta www.nationaalarchief.nl.
Busca den e siguiente archivonan si bo a nace na e siguiente lugarnan:
-Boneiro: https://www.nationaalarchief.nl/onderzoeken/archief/1.05.01.02/invnr/246/file/NL-HaNA
1.05.01.02_246_0001;
-Corsow: https://www.nationaalarchief.nl/onderzoeken/zoekhulpen/curacao-slaven-en-
emancipatieregisters-1839-1863;
-Sint Maarten/Sint Eustatius/Saba:
https://www.nationaalarchief.nl/onderzoeken/Index/nt00341/2a842672-d7f2-11e2-aOc1-
00505693001d;
-Surinam: https://nationaalarchief.nl/onderzoeken/zoekhulpen/suriname-slavenregister-1816-1863;
-Inglatera: https://nationalarchives.gov.uk/help-with-your-research/reseach-guides/slavery-or-slave-
owners.
-Francia: https://esclavage-indemnites.fr/public
Señora Peterson ta desea bo persona hopi exito cu bo buskeda.
