Director finansiero di Stichting HUNTO, Randall van Trigt, a expresa su gran satisfaccion cu e trailer nobo di e fundacion ta representa un logro hopi grandi, no solamente pa e organisacion mes, sino tambe pa Aruba.
Durante e evento, Van Trigt a indica cu e proyecto a bira posibel danki na e sosten y confiansa cu Stichting HUNTO a ricibi for di sector comercial. Tanto comercio local como internacional a contribui pa logra e meta cu a culmina den e realisacion di e trailer.
El a expresa su sincero gradicimento na tur empresa y colaborado cu a brinda apoyo pa haci e iniciativa aki bira realidad.
“Nos ta hopi agradecido cu e confiansa cu comercio a pone den Stichting HUNTO, loke a permiti cu awe nos por presenta e proyecto aki como un realidad,” Van Trigt a comenta.
Segun e director financiero, e trailer ta forma parti di e esfuerso continuo di Stichting HUNTO pa amplia e asistencia na adictonan ambulante y pa sigui contribui na bienestar social den Aruba.
