ORANJESTAD,Aruba
Diamars 28 di januari a tuma luga e huramentacion di Marisol Lopez – Tromp como Minister di Desaroyo Teritorial, Infrastructura y Medio Ambiente. Minister President sra. Evelyn Wever – Croes y coleganan Minister di Gabinete Wever – Croes tabata presente na e ceremonia cu a tuma luga na Cas Ceremonial di Gobernador.
Minister Marisol Lopez – Tromp ta un di e politiconan activo cu tin un trayectoria basta largo y cu experiencia amplio. Despues di tabata representa pueblo durante e ultimo 10 añanan den Parlamento, e aña aki Minister Lopez – Tromp ta bolbe como Minister.
Continuidad di trabou
Pa locual ta trabounan, ta importante pa menciona cu Gabinete Wever – Croes ta ehecutando e acuerdo di programa di Gobernacion “Hunto pa Aruba” durante e transcurso di e dos añanan aki, esaki ta e mesun acuerdo cu Minister Lopez – Tromp a indica di lo bay sigui. ‘Ademas, faltando un poco menos cu dos aña di Gobernacion, e continuacion di trabounan ta hopi importante, banda di otro leynan pendiente y nobo. Esaki lo ta posibel cu contribucion di coleganan Minister y Prensa pa por transmiti e trabounan aki den forma transparente y corecto na comunidad’, Minister Lopez – Tromp a duna di conoce.
Resumen di trayecto politico
Minister Marisol Lopez – Tromp a inicia su carera politico mas di 22 aña pasa na aña 1998 riba lista di MEP, drentando Parlamento den oposicion cu votonan preferencial (1538 voto). Casi cuater aña despues a ricibi casi 5000 voto durante eleccion y di e forma aki por a drenta como Minister enarga cu e cartera di Infrastructura, Asuntonan Social, Educacion y Vice Prome Minister di Pais Aruba te cu aña 2009. Un combinacion cu ta carga awe pa 3 Minister, pues un cartera hopi importante pa desaroyo di Aruba cu ta stimula economia a traves di casnan social, casnan pa anciano y scolnan.
Pa conclui, manera treci dilanti anteriormente, despues di 10 aña den Parlamento, Minister Marisol Lopez – Tromp ta cla un bes mas pa e reto nobo como e Minister encarga cu Desaroyo Teritorial, Infrastructura y Medio Ambiente.
