Seshon di informashon konhunto di stakeholdernan
Tourism Corporation Bonaire (TCB) den kolaborashon ku Bonaire International Airport (BIA), Bonaire Hotel and Tourism Association (BONHATA), Entidat Públiko Boneiru i Kapitan di Haf, dia 21 di yüli 2025 a organisá e di dos ‘Bonaire Tourism Update’ di kada tres luna pa aña 2025 na Plaza Beach & Dive Resort.
Diputado Clark Abraham a trese lo siguiente padilanti: “Entre 2017 i 2024 e kantidat di turista a subi di 128.000 pa 182.000; un kresementu di 42%, miéntras ku e kantidat di kamber disponibel a subi di 1825 pa 2950, un oumento di 62%, loke a surpasá e meta original ku 22%. E durashon promedio di estadia tambe a mehorá: di 8,2 pa 9,8 dia. Pa aña 2025 a stipulá e presupuesto di TCB na 3 mion dòler, ku un enfoke fuerte riba e indikadónan importante di prestashon (KPI’s) manera kuantu kada turista ta gasta, e kantidat di bishitantenan stayover pa kada merkado (pa luna, pa kuartal i pa aña), e entrada promedio pa dia (ADR) i e entrada pa kada kamber disponibel (RevPar).”
Elesiër Angel, direktor di TCB, a presentá e resultadonan preliminar i a revelá ku den e di dos kuartal di aña 2025 Boneiru a yama bon biní na mas ku 45.000 bishitante stayover, kompará ku mas òf ménos 41.000 bishitante den e mesun periodo na aña 2024. El a menshoná e merkadeo, e relashonnan públiko (PR) i e eventonan den e di dos kuartal, entre otro e grupo kultural TCB & Friends pa Dia di Rincon, bishitanan di prensa den luna di aprel, e PAMAC Destination Summit, enkuentronan stratégiko, e prestashonnan di ‘airlift’ i e kampañanan di merkadeo pa esaki, i tambe un presentashon pa e sekretario di estado i miembronan di Tweede Kamer, banda di otro aktividatnan. E luna akí a yama bon biní tambe na e promé buelo for di Repúblika Dominikana ku Air Century. Inisiativanan ku ta na kaminda ta e siguiente Taste of Bonaire ku ta planiá pa 9 di ougùstùs, i Boneiru ta preparando su mes tambe pa partisipashon na e DEMA Show den luna di novèmber.
“E aktualisashonnan di kada tres luna akí ta nos kompromiso ku transparensia den akshon. Nos ta trese partnernan, stakeholdernan, prensa i públiko huntu pa honestamente evaluá e tendensianan den e sektor i pa mesora atendé ku nos desafionan. E diálogo habrí akí ta krusial pa desaroyo di un strategia uniforme, ku ta sòru pa e kresementu di nos turismo na un manera duradero ta enrikesé nos isla i tur hende ku ta yama e isla akí nan kas”, segun Elesiër Angel, direktor di Tourism Corporation Bonaire.
“Den e di dos kuartal di aña 2025 Boneiru a yama bon biní na 29 barku krusero i 86.946 pasahero, entre otro e promé bishitanan di Orion (National Geographic) i Explora I (MSC Explora),” segun e kapitan di haf Günther Flanegin. “Ku loke e pasaheronan ta gasta ku ta totalisá $ 26 mion i un kontribushon adishonal di $ 2,1 mion di parti di e tripulashon, un maneho nobo di reservashon pa biahenan krusero ta keda desaroyá, basá riba un investigashon di BREA spesífikamente pa Boneiru, pa haña un ekilibrio entre e kresementu di turismo i e eksperensia di e bishitantenan. Esaki ta enserá un refinamentu di e regla di un solo barku pa dia pa brinda mas fleksibilidat a base di e kantidat di pasahero.”
“Boneiru su resultadonan den e di dos kuartal ta suprayá tantu e resiliensia komo e vulnerabilidat di nos sektor turístiko”, segun Veroesjka de Windt, direktor di BONHATA. Nos a mira resultadonan alentador – e tarifanan promedio pa dia a subi ku 11,5% i e RevPar a subi ku 13,4% kompará ku e di dos kuartal di aña 2024 – pero e kresementu akí ta prinsipalmente danki na stipulashon di preis i no a un demanda ku ta oumentando. E grado di okupashon a subi ku solamente 1,6%, loke ta un indikashon ku e prestashonnan ta dependé mas di e oumentonan di tarifa ku di volúmen. Mirando padilanti nos ta bai haña nos konfrontá ku un inseguridat ku ta oumentando. E gastunan operashonal ta subi, e grado di okupashon di kompanianan aéreo ta bou di preshon i e demanda for di merkadonan importante, manera Merka, a kuminsá bira ménos komo konsekuensia di e instabilidat ekonómiko mas amplio. E faktornan akí ta forma un riesgo real pa e futuro kresementu. Na BONHATA nos ta sigui hasi esfuerso pa un kolaborashon estrecho ku gobièrnu, empresanan lokal i e komunidat mas amplio pa fortifiká e base di nos ekonomia. Huntu nos ta aspirá pa yega na un modelo sostenibel di turismo – un model ku ta na bienestar di nos habitantenan, ku ta protehá nos medio ambiente i ku ta sigurá un futuro vibrante pa Boneiru.”
“Den e di dos kuartal e kantidat di pasahero na Flamingo Airport a subi ku 11,8%, pa un gran parti danki na e kresementu fuerte na American Airlines. Nos a kontinuá ku implementashon di vários mehorashon, entre otro instalashon di un sistema nobo di transporte di ekipahe den sala di salida i un fèn den sala di yegada. Aktualmente nos ta preparando pa instalashon di algun ‘security lane’ nobo i nos ta trahando huntu ku Entidat Públiko Boneiru riba outomatisashon di e proseso di impuesto di turista. Resientemente nos a firma tambe un kòntrakt importante pa konstrukshon di un parke solar riba nos lugá di stashoná outo”, segun Maarten van der Scheer, direktor di BIA.
Un danki spesial ta bai pa Plaza Beach & Dive Resort pa a spònser e sala di reunion i e Tourism After 5.
Pa mas informashon bo por manda un email na marketing@bonaireisland.com.