E di sinku edishon di No Mas No More a tuma lugá na Sint Maarten di 16 pa 19 di yüni. Durante e reunion aki profeshonalnan di tur seis isla di e parti Karibense di Reino a bini huntu. Representantenan di Ministerio di Salubridat, Bienestar i Deporte (VWS), Enseñansa, Kultura i Siensia (OCW) i Hustisia i Seguridat (JenV) tambe tabata presente.
E mensahe sentral di e konferensia di trabou tabata kla: ta importante pa nos traha huntu na ratifikashon di e Tratado di Istanbul. E tratado aki ta konserní prevenshon i kombatimentu di violensia kontra hende muhé i violensia doméstiko.
Durante e konferensia di trabou a traha riba plannan di akshon riba seis tema: igualdat di género, òrdu di protekshon temporal i métodonan di “time-out”, salú mental relashoná ku violensia doméstiko, kambio di komportashon komo parti di kampañanan di konsientisashon, kolekshon di dato i asistensia na personanan indokumentá den situashonnan di violensia doméstiko. E temanan aki ta direktamente mará na vários artíkulo di e Tratado di Istanbul.
E puntonan klave di e MoU, ku e islanan a firma durante e último konferensia di No Mas No More, tambe a keda inkorporá den e plannan di akshon. Ta trata di e siguiente temanan: kolaborashon den Reino entre shèltèrnan pa víktima, kódigo di protekshon, investigashon, konsientisashon, kompartí konosementu i desaroyo di ekspertisio.
E tema di e konferensia aki ta mas ku un lema—e ta representá un kompromiso pa akshon konkreto. E enkuentro aki no ta djis tokante kada ken su asistensia; presensia di kada persona a amplifiká un mensahe poderoso di resolushon kolektivo. No Mas, No More, Ni Aki, Ni Niun Kaminda,” asina Minister di Salubridat Públiko, Desaroyo Sosial i Labor di Sint Maarten, sr. Richenel Brug, a bisa.
E grupo di trabou No Mas No More, ku ta konsistí di miembronan di tur seis isla i di Ministerio di Salubridat, Bienestar i Deporte, lo sigui traha riba elaborashon di e plannan di akshon riba nan propio islanan despues di e konferensia, huntu ku partnernan di kadena, den e kadena di hustisia i sosten.
E konferensia tabata un éksito. Tabatin hopi espasio pa kompartí konosementu, eksperensia i ideanan. E partisipantenan a regresá nan islanan ku un vishon renobá i plannan konkreto pa sigui konstruí un futuro sigur pa un i tur.