ORANJESTAD, Aruba
Recientemente via diferente media di comunicashon y alavez rednan social nos por wak un wega cu ta wordo hunga door di hobennan, unda 3 mucha ta envolvi. 1 mucha para mey mey y e otro dosnan cada banda. Na momento cu e mucha mey mey bula e dosnan na banda ta hala e pia di esun mey mey cu e ta perde su balans y ta cai abou. Na momento cu e mucha aki cai, e lo por lastima su mes gravemente. Aki nos mester pensa cu e mucha por cai di tal manera cu e ta dal su cabez riba vloer cu consecuencia un lichte tot zware hersenschudding o den caso extremo e por ta hasta un golpi fatal.
Pesey mes como educador y politico mi ta urgi na nos mayornan pa papia cu nos yuinan tocante esaki y pone hopi enfasis riba e consecuencia cu esaki por tin pa e mucha.
Na mes momento mi kier a hasi e pregunta na nos minister di Ensenjanza, Minister A. Lampe, si e ta na altura di e tipo di wega asina aki, y si su ministerio ja caba a saka un alerta pa e scolnan na Aruba pa no tolera e tipo di weganan asina aki.
Y pa medio di su ministerio instrui scolnan pa incorpora charlanan pa consientisa nos hobenan riba nan comportashon y pa evita hunga weganan cu por tin consecuencia hororoso como resultado.
Esaki mi ta pidi tambe na cada schoolbestuur y cada cabesante di e difente scolnan aki na Aruba, pa nos tuma e wega akin a serio y conjuntamente traha na e parti preventivo.
Mi consejo personal, ban evita awe, pa no lamenta manjan.
