Aruba –05 december 2020: Den e ultimo lunanan cu a pasa, departamento di douane na airopuerto a intercepta diferente turista cu na momento di regresa nan pais, kier hiba cu nan cocolishi, santo blanco y coral for di nos naturalesa.
Conforme e tratado international di CITES y nos leynan local manera e landsbesluit bescherming inheemse Flora & Fauna y e Zandverordening, ta prohibi pa saca y exporta cocolishi, coral y santo blanco for di Aruba pa proteha nos medio ambiente.
E cantidad di cocolishi, coral y santo blanco confisca ta hopi stranjo y ta suspecha cu hende local of residente lo por ta ofreciendo esakinan na benta cu e turistanan locual ta prohibi.
Ora e turistanan yega airopuerto nan ta wordo confronta cu un boet y e material ta wordo confica. Esaki sigur no ta un experiencia agradabel pa e turista na momento cu eta bandona nos isla. Esaki por conduci na reaccionan negativo cu ta pone Aruba su sector turistico den un luz negativo
Ban hunto duna nos naturalesa e respet cu e menece pa asina proteha nos medio ambiente, stop di colecta cocolishi, santo blanco of coral for di nos naturalesa y stop di ofrese turista esakinan. Ken no kier pa nos futuro generacion y turistanan por gosa di nos beachnan, cocolishi y coral? Ban hunto proteha loke ta di nos.
