Despues di e anuncio recientemente di materialnan deportivo cu a yega Aruba pa nos hobennan, awe tin otro anuncio.
Manera ta conocí, aña pasa Sidney Ponson Charity Foundation a firma un acuerdo cu Bubali Sport Club pa desaroyo di e área aki den un compleho deportivo.
E siman aki a tuma luga otro reunion den dirección di realizacion di un proyecto bunita pa Aruba.
Un parti di e proyecto ta construccion di Sidney Ponson Stadium den e Compleho Deportivo di Bubali. Miembronan di directiva di Bubali a sinta cu directiva di e fundacion pa mira cual ta e ultimo tramitenan cu mester realisa ainda, pa fase di construccion por cuminsa.
E lo ta un soño bira realidad di e ex pelotero di Grandes Ligas, unda cu e lo por yuda mas hoben keda riba e bon caminda, practicando deporte.
