Miss Turismo Aruba, Kayla Villasmil ta yega Aruba pa participa den certamen di Miss Turismo World cu e aña aki ta tuma lugar na Aruba.
Kayla ta studiando ‘Lerarenopleiding Geschiedenis’ na Hogeschool Rotterdam y ta biba na Den Haag. Januari ultimo, el a wordo corona Miss Turismo Aruba y despues di un preparacion basta extenso, awo ta cla pa e certamen Internacional na Aruba mes.
Kayla, di chikito a participa den varios festival cultural di canto, e.o. Himno y bandera y a logra gana y varios bes sali den finalista. El a canta den agrupacionnan manera Melodia y Katatumbo den su hubentud.
Su pasion grandi, for di chikito, ta “Rhythmic Gymnastics”, un deporte cu el a cuminsa cu 8 aña di edad y despues a competi y gana den varios ocassion den exterior. Depues el a fungi como coach di e deporte te ora cu e mester a bay Hulanda pa sigui su estudio den exterior.
Na 2021, prome cu el a bay Hulanda, el a representa Oranjestad como Miss Youth Oranjestad den e certamen di Miss Youth Aruba. Ey el a logra varios titulo, entre otro Miss Press y 2° finalista di e certamen.
Kayla, hunto cu su team, lidera pa e conocido Endy Croes, a prepara y train extensamente pa Aruba por ta bon representa den e certamen internacional aki. Mas detaye di preparacion y presentacion nos ta haya na su yegada riba su isla natal, dialuna tardi, cu vuelo di TUI directamente for di Amsterdam.
Certamen di Miss Turismo World ta cuminsa dia 27 di mei cu yegada di candidatanan for di varios pais cu ta participando. Durante henter e siman tin eleccionnan pre-liminario y eventonan formal. E anochi final ta diasabra 31 di mei 2025.
