Den presencia di un gran cantidad di hende, dia 8 di november a tuma lugar e anochi benefico pa presenta e plannan di e renovacion di e teatro nacional di Aruba, Cas di Cultura. E evento aki, organisa pa Cas di Cultura y Representacion di Hulanda na Aruba (VNO), a reuni figura prominente for di e sector cultural, publico y privado di Aruba pa un anochi di musica y inspiracion.
E evento a wordo oficialmente habri pa Prome Minister di Aruba, Su Excelencia Mike Eman, cu a enfatisa e importancia di Cas di Cultura pa Aruba y pa cultura como e fundamento pa educacion, identidad y union den comunidad. Eman, na nomber di Gobierno di Aruba, a anuncia un compromiso adicional di 5 miyon florin pa e renovacion.
E anochi a wordo dirigi pa Vicky Arens, director di Cas di Cultura, y Vincent Storimans, Director di Representacion di Hulanda na Aruba. Nan a subraya e importancia di colaboracion cultural den Reino y e meta comun pa conserva y fortalece e herencia cultural di Aruba.
“E experiencia positivo cu un mucha ta haya na Cas di Cultura ta fortifica e lazo cu nos isla, y esaki ta algo cu nos ta desea pa tur hende. Nos no ta haya solamente un edificio renoba, sino un compleho diseña cu un bista sostenibel pa e futuro” segun Vicky Arens.
“Cas di Cultura ta mas cu un teatro – ta un punto di encuentro caminda generacionnan di Arubiano ta reuni pa comparti arte, musica y experiencia,” segun Vincent Storimans, Director di e Representacion di Hulanda na Aruba (VNO). “Cu e anochi benefico aki, nos ta celebra no solamente e rikesa cultural di Aruba, sino tambe nos cooperacion pa e futuro cultural di nos pais.”
Durante e anochi, tambe a tuma palabra Ronella Croes, CEO di Aruba Tourism Authority (ATA), y Roland Croes, director di SETAR, cu a enfatisa e papel esencial cu cultura tin den sociedad. Den e contexto aki, ATA a anuncia un donacion di 1 miyon florin pa e renovacion di Cas di Cultura.
E evento benefico a tuma lugar den e elegante ballroom di Hilton Aruba Caribbean Resort & Casino, caminda e invitadonan a disfruta di un anochi di cocktail cu un ambiente agradable. E parte musical a wordo brinda pa e internacionalmente renombra Reverón Trio, acompaña pa e artista invita Qiao Chen Solomon (violin) y Joel Pagán (altviolin).
Durante e anochi tabatin hopi atencion pa e renovacion di Cas di Cultura y e esfuerso pa recauda fondo pa esaki. Den e proyecto di renovacion di Cas di Cultura, e Gobierno di Aruba, empresanan local y donantenan particular ta haci nan aporte. Te awor, rond di 63% di e 17 miyon florin necesario a wordo priminti.
Si bo ta desea contribui tambe na e renovacion di Cas di Cultura, por tuma contacto via info@casdicultura.aw of bishita: https://casdicultura.aw/e-brasa-renovation/
Press release: VNO
