Awe Boneiru a pone un paso importante den direkshon di un desaroyo fuerte i resiliente pa nos isla. Entidat Públiko Boneiru i Gobièrnu di Reino a firma Regio Deal Boneiru ofisialmente. Ku e kolaborashon akí ta invertí €13 mion den proyektonan ku ta mehorá habitabilidat, alkansabilidat i outosufisiensia di nos isla. Regio Deal Boneiru ta enfoká riba dos aspekto prinsipal:
* Konektividat i Alkansabilidat: desaroyo di un Sentro Multifunshonal, mihó maneho di awa, ambiente seif di skol i implementashon den fase di transporte públiko.
* Outosufisiensia: realisashon di un sitio pa stashoná kònteiner i panel solar riba e skolnan básiko pa baha gastu i promové sostenibilidat.
Traha huntu pa logra un Boneiru sostenibel
Boneiru ta kresiendo i ta kambiando rápidamente. Esaki ta brinda vários oportunidat, pero ta bini ku hopi reto tambe. Regio Deal ta ehekutá proyektonan ku ta kontribuí na un Boneiru seif, sostenibel i sosialmente konektá. Akseso na skol i plenchi di skol ta bira mas seif i mas atraktivo, ta instalá panel solar na e skolnan, paso pa paso ta ehekutá transporte públiko i ta traha riba mihó maneho di awa loke ta na benefisio di agrikultura tambe.
Banda di esaki ta realisá un Sentro Multifunshonal: un sitio sentral pa desaroyo ekonómiko, kultura, desaroyo di talento, edukashon, evento i enkuentro. Ta bin tambe un lugá pa stashoná kònteiner den bisindario di haf pa hasi transporte di merkansia mas seif i mas efisiente. Mas aleu e skolnan básiko ta haña panel solar, di manera ku gastu di koriente ta baha i e ekonomisashon akí ta sirbi pa fortifiká kalidat di enseñansa.
Gezaghèber John Soliano ta enfatisá kon orguyoso Boneiru por ta ku e kolaborashon akí i ku e oportunidatnan ku ta surgi pa medio di esaki. E ta indiká ku ta ehekutá proyektonan di Regio
Deal ku ta promové konektividat físiko i sosial i alkansabilidat na nos isla i ku ta oumentá Boneiru su outosufisiensia. ‘Nos ta hopi orguyoso,’ segun Soliano.
Kolaborashon pa un Boneiru resiliente pa futuro
Entidat Públiko Boneiru ta ehekutá e proyektonan, den kolaborashon estrecho ku gobièrnu di Reino i partnernan i stakholdernan lokal. E esfuerso konhunto akí ta uni konosementu, forsa i fondo pa traha huntu pa logra un Boneiru sostenibel, seif i ku enfoke riba futuro.
Pa mas informashon, wak nos wèpsait www.bonairegov.com/pa/habitante/regio-deal òf tuma kontakto ku departamento di Komunikashon di Entidat Públiko Boneiru via communicatie@bonairegov.com òf +599 717 5330.
Press release: Gobièrnu di Boneiru
